சென்னை – தென்னிந்திய நடிகர் சங்கத்திற்கான தேர்தலுக்கான வேட்பு மனு தாக்கல் அக்டோபர் 1-ஆம் தேதி முதல் 3-ஆம் தேதி வரை நடைபெறும் எனத் தேர்தல் ஆணையராக நியமிக்கப்பட்டுள்ள முன்னாள் நீதிபதி ஈ.பத்மநாபன் தெரிவித் துள்ளார்.
2015 – 2018 ம் ஆண்டுகளுக்கான தென்னிந்திய நடிகர் சங்கத் தேர்தல் சென்னை மயிலாப்பூர் செயின்ட் எப்பாஸ் மேல்நிலைப்பள்ளியில் அக்டோபர் 18-ஆம் தேதி நடை பெறும் என்று அவர் நேற்று முன்தினம் தெரிவித்தார்.
இதையடுத்து நேற்று வேட்பு மனு தாக்கலுக்கான தேதியை அவர் அறிவித்துள்ளார்.
உயர் நீதிமன்ற உத்தரவின்படி தயார் செய்யப்பட்ட வாக்காளர் பட்டியலில் உள்ளவர்கள் மட்டுமே வேட்புமனு தாக்கல் செய்ய முடியும்.
அக்டோபர் 1-ம் தேதி காலை 11 மணி முதல் 3-ம் தேதி 5 மணி வரை தேர்தல் அலுவலகத்தில் வேட்புமனு தாக்கல் செய்யலாம்.
வெளியூரில் இருக்கும் நடிகர் சங்க உறுப்பினர்கள் நேரில் வர இயலாவிட்டால் அக்டோபர் 3-ம் தேதி மாலை 5 மணிக்குள் தேர்தல் அலுவலகத்தில் கிடைக்குமாறு வேட்புமனுக்களைத் தபால் அல்லது கொரியர் மூலம் அனுப்பலாம்.
வேட்பு மனுக்கள் மீதான பரிசீலனை அக்டோபர் 4-ஆம் தேதி நடைபெறும்.
போட்டியில் இருந்து விலகிக்கொள்ள விரும்புபவர்கள் 7-ஆம் தேதி மாலை 5 மணிக்கு முன்பாக அலுவலகத்தில் கடிதத்தைத் தாக்கல் செய்ய வேண்டும் என அறிவிக்கப்பட்டுள்ளது.
