நியூ யார்க் – இந்தியாவின் சானியா மிர்சா, சுவிட்சர்லாந்தின் மார்டினா ஹிங்கிஸ் ஜோடி மீண்டும் ஒரு அசத்தலான ஆட்டத்தை வெளிப்படுத்தி, அமெரிக்க ஓபன் (US Open) டென்னிஸ் தொடரில் பெண்களுக்கான இரட்டையர் பிரிவில் சாம்பியன் பட்டம் வென்றுள்ளது.
மார்டினா ஹிங்கிசுடன், சானியா இணைந்த பிறகு வரிசையா இந்த இணை சாம்பியன் பட்டங்களை வென்று வருகிறது. ஏற்கனவே கடந்த ஜூலை மாதம் நடந்த முக்கியத்துவம் வாய்ந்த விம்பிள்டன் போட்டியில் இவர்கள் சாம்பியன் பட்டம் வென்று, உலகின் முதல் நிலை ஜோடி ஆன நிலையில், தற்போது அமெரிக்க ஓபன் போட்டியிலும் பட்டம் வென்று அசத்தி உள்ளனர்.
நேற்று நடந்த இறுதிப் போட்டியில், சானியா ஜோடி, ஆஸ்திரேலியாவின் டெல்லாகுவா, கஜகஸ்தானின் யரோஸ்லாவா ஷிவ்டோவா ஜோடியை எதிர்கொண்டது. இதில், எதிர் இணைக்கு வாய்ப்பே அளிக்காமல் 6-3, 6-3 என்ற நேர் செட் கணக்கில் சானியா இணை வெற்றி பெற்றது.
இந்த தொடரில் ஏற்கனவே, மார்டினா ஹிங்கிஸ் இந்தியாவின் லியாண்டர் பயசுடன் சேர்ந்து கலப்பு இரட்டையரில் சாம்பியன் பட்டம் வென்றுள்ளார். இதே இணை, விம்பிள்டன் போட்டியிலும் சாம்பியன் பட்டம் வென்றது குறிப்பிடத்தக்கது.
