புது டெல்லி – ஆப்பிள் நிறுவனத்தின் ஐபோன்களுக்கான எதிர்பார்ப்பு மேற்கத்திய நாடுகளைப் போலவே இந்தியாவிலும் அதிகரிக்கத் தொடங்கி உள்ளது. இதற்கு ஐபோன் 6-ன் வெளியீடு முந்தைய உதாரணமாக இருந்தாலும், தற்போதய உதாரணம் ஐபோன் 6 எஸ் தான்.
அக்டோபர் 16 (இன்று) அதிகாலை சரியாக 12 மணிக்கு இந்தியாவில் வெளியான ஐபோன் 6 எஸ் மற்றும் ஐபோன் 6 எஸ் பிளஸ் திறன்பேசிகளுக்காக மக்கள் இரவு முதலே காத்திருந்தனர்.
இதுவரை இந்தியாவில் வெளியான திறன்பேசிகளில், விலை அதிகமுள்ள திறன்பேசி ஐபோன் 6 எஸ் பிளஸ் தான். இந்தியாவில் ஆப்பிளின் இந்த வெளியீடு, கண்டிப்பாக பெரிய வர்த்தகத்தை ஈட்டித் தராது என்றெல்லாம் கூறப்பட்ட நிலையில், டெல்லியில் ஆண்களும், பெண்களும் வரிசையில் நின்று ஐபோன்களை வாங்கிச் சென்றது ஆப்பிள் நிறுவனத்திற்கே ஆனந்த அதிர்ச்சியை கொடுத்திருக்கும்.
அதனை உறுதிபடுத்தும் விதமாக, ஆப்பிள் தலைவர் டிம் குக், தனது டுவிட்டர் பதிவில், “நள்ளிரவிலும், ஐபோன் 6 எஸ் மற்றும் ஐபோன் 6 எஸ் பிளசிற்காக வரிசையில் காத்திருந்த இந்திய வாடிக்கையாளர்களுக்கு நன்றி” என்று அவர் தெரிவித்துள்ளார்.
