சென்னை – சட்டமன்ற தேர்தலில் திமுக கூட்டணியில் இணைய காங்கிரஸ் கட்சிக்கு அழைப்பு விடுத்துள்ளார் திமுக தலைவர் மு.கருணாநிதி.
நேற்று இரவு சென்னை அண்ணா அறிவாலயத்தில் செய்தியாளர்களைச் சந்தித்த கருணாநிதி, தேர்தல் குறித்தும், ஜல்லிகட்டு விவகாரங்கள் குறித்தும் செய்தியாளர்களின் கேள்விகளுக்குப் பதிலளித்தார்.
அப்போது, தேமுதிக-வுக்கு கூட்டணியில் சேர அழைப்பு விடுத்தீர்கள். அதைப் போலவே காங்கிரஸ் கட்சிக்கும் அழைப்பு விடுவீர்களா? என்று செய்தியாளர்கள் கேள்வி எழுப்பினர்.
அதற்குப் பதிலளித்த கருணாநிதி, கூட்டணிக் கட்சிகளுக்கு அழைப்பு விடும் போது காங்கிரசை நாங்கள் விலக்கி விடமாட்டோம் என்று தெரிவித்துள்ளார்.
ஒருகாலத்தில், தேர்தலில் திமுக-வுடன் கூட்டணி வைக்க மற்ற கட்சிகள் வரிசையில் காத்துக் கிடந்த காலம் போய், தற்போது தேர்தலுக்கு இன்னும் 5 மாதங்களே உள்ள நிலையில், தேமுதிக-வையும், காங்கிரசையும் கூட்டணியில் இணைந்து கொள்ளுமாறு திமுக தானே வலியவந்து கேட்கும் நிலை ஏற்பட்டுள்ளது குறிப்பிடத்தக்கது.
