கோலாலம்பூர் – உலக அளவில் இணையப்பயன்பாட்டாளர்களை அதிகம் கவர்ந்த உலவி (Web Browser) என்றால் அது கூகுள் குரோம் தான். இணைய உலகில் கோலோச்சிய இன்டர்நெட் எக்ஸ்புளோரரை (IE) வீழ்த்தி கூகுள் குரோம் முதலிடம் பெற்றதற்கு அதன் வேகம் தான் காரணம். அதே சமயம் எக்ஸ்புளோரரைக் காட்டிலும் பயன்படுத்துவதற்கு எளிமையாக இருந்ததும், குரோமின் வெற்றிக்கு முக்கியக் காரணம்.
இந்நிலையில், கூகுள் நிறுவனம் தற்போது இருக்கும் குரோமின் வேகத்தை இன்னும் அதிகப்படுத்தி, ஈடு இணையில்லாத சேவையை வழங்கி பயனர்களின் இணையச் செயல்பாட்டில் நிரந்தர விருப்பமாக இருக்க முடிவு செய்துள்ளது. ‘ப்ரோட்லி’ (Brotli) என பெயரிடப்பட்டுள்ள அந்த மேம்பாடு, வழக்கமான கூகுள் குரோமைக் காட்டிலும், 26 சதவீதம் அதிவேகமாக இருக்கும் என்று கூகுள் சார்பாக தெரிவிக்கப்பட்டுள்ளது.
அதேபோல், திறன்பேசிகளில் இந்த உலாவியை பயன்படுத்தினால், தரவுகளின் நுகர்வும் (Data Consumption) குறையும் என்றும் கூறப்படுகிறது.
எனினும், இதற்கான அறிவிப்புகளும், நடைமுறை சாத்தியங்களும் எப்போது என்பது கூகுளுக்கு மட்டுமே வெளிச்சம்.
