சென்னை – இன்போசிஸ் பொறியியலாளர் சுவாதி கொலை வழக்கில், சென்னை காவல் துறைக்கு கடந்த எட்டு நாட்களாக ‘தண்ணி’ காட்டி வந்த கொலையாளி நேற்று பிடிபட்டிருக்கின்றான். அந்த விவகாரம் குறித்த புதிய, அண்மையத் தகவல்கள் இவை:
செங்கோட்டையில் கைது
- கொலையாளியின் பெயர் ராம்குமார். திருநெல்வேலி அருகே, தென்காசி பகுதியில், செங்கோட்டை என்ற இடத்தில் உள்ள மீனாட்சிபுரம் கிராமத்தில் அவனைக் காவல் துறையினர் சுற்றி வளைத்து கைது செய்துள்ளனர்.
பிளேடால் அறுத்துக் கொண்டு தற்கொலை முயற்சி
- காவல் துறையினர் ராம்குமாரை சுற்றி வளைத்து கைது செய்ய முற்பட்டபோது, அவன் தன் கையில் வைத்திருந்த பிளேடால் கழுத்தை அறுத்துக் கொண்டு தற்கொலை முயற்சியில் ஈடுபட்டிருக்கின்றான். ஆனால் காவல் துறையினர் உடனடியாகத் தடுத்து, அவனைக் கைது செய்து தற்போது மருத்துவமனையில் வைத்திருக்கின்றனர்.
- அருகில் உள்ள அரசு மருத்துவமனையில் ராம்குமார் தற்போது சிகிச்சை பெற்று வருகின்றான்.
தாத்தாவின் அரிவாளைக் கொண்டு கொலை
- விவசாயப் பின்னணி கொண்ட குடும்பத்தைச் சேர்ந்த ராம்குமார், அவனது தாத்தா பயன்படுத்திய அரிவாளைக் கொண்டு சுவாதியைக் கொலை செய்திருக்கின்றான்.
- கொலைக்குப் பயன்படுத்தப்பட்ட அரிவாள் அவ்வளவாக தமிழ் நாட்டில் பயன்படுத்தப்படுவதில்லை. மைசூர் பகுதியில் பழங்குடியினர் பயன்படுத்தப்படும் அரிவாள் இது என்றும் தகவல்கள் தெரிவிக்கப்பட்டன.
- கொலை செய்ததும் அந்த அரிவாளில் பதிந்திருந்த தனது கைரேகைகளை அழித்து விட்டு, அரிவாளை வீசி விட்டு சென்றிருக்கின்றான் ராம்குமார். பின்னர் காவல் துறையினர் அந்த அரிவாளைக் கைப்பற்றியிருக்கின்றனர்.
இளைஞர் விடுதியில் (மேன்சன்) தங்கியிருந்தான்
- நுங்கம்பாக்கம் அருகில் இருந்த ஓர் இளைஞர் தங்கும் விடுதியில் ராம்குமார் தங்கியிருந்திருக்கின்றான்.
- அவன் குறித்த தகவல்களை அந்தத் தங்கும் விடுதியின் காவலாளி தெரிவித்திருக்கின்றார்.
- கொலை நடந்த நுங்கம்பாக்கம் பகுதியில், கொலை நடந்த நேரத்தில் அங்குள்ள தொலைத் தொடர்பு கோபுரத்தில் பதிவாகியிருந்த சுமார் 5 இலட்சம் கைத்தொலைபேசி அழைப்புகளை காவல் துறையினர் நுணுக்கமாகவும், அணுக்கமாகவும், ஆராய்ந்திருக்கின்றனர்.
- குறிப்பாக, சுவாதியின் கைத்தொலைபேசி உரையாடல்கள் ஆராயப்பட்டத்தில் சில விவரங்களை காவல் துறையினர் பெற்றிருக்கின்றனர்.
- நுங்கம்பாக்கம் பகுதியில் வீடு வீடாக சோதனை நடத்திய காவல் துறையினர், ஒவ்வொரு பகுதியையும், ஒவ்வொரு வீட்டையும் அலசி ஆராய்ந்தனர்.
- அதன்படி, அந்தக் குறிப்பிட்ட விடுதியில் தங்கியிருந்தவர்களை விசாரித்ததில், கடந்த சில நாட்களாக அங்கு தங்கியிருந்துவிட்டு, இப்போது காலி செய்துவிட்டுப் போனவர்களின் பின்னணியை காவல் துறையினர் ஆராய்ந்ததில், ராம்குமார் குறித்த தகவல்கள் கிடைத்திருக்கின்றன.
- அந்த விடுதியில் தங்கியிருந்த அவன் பின்னர் கொலையைச் செய்து விட்டு, அறையைக் காலி செய்துவிட்டு வெளியேறியிருக்கின்றான்.
மீனாட்சிபுரம் கிராமம் நோக்கி விரைந்த காவல் துறையின் தனிப்படை
- உடனடியாக செங்கோட்டை பகுதி நோக்கி விரைந்த தனிப்படை மீனாட்சிபுரம் என்ற கிராமத்தில் ராம்குமாரின் தாத்தா வீட்டில் அவனைக் கைது செய்தனர்.
- ஒரே நாளில் – ஒரே சம்பவத்தில் இன்றைக்கு இந்தியா முழுவதும் புகழ்பெற்ற கிராமமாக மீனாட்சிபுரம் உருமாறிவிட்டது.
- ராம்குமார் குடும்பத்தினரிடம் தற்போது காவல் துறையினர் விசாரணை நடத்தி வருகின்றனர்.
முகநூல் கலாச்சாரமும் – ஒரு தலைக்காதலும் இணைந்த கொலை
- இது ‘ஒரு தலைக்காதல்’ என முதல் கட்ட விசாரணைகள் தெரிவிக்கின்றன.
- கடந்த 3 மாதங்களாக சுவாதியை விரட்டி, விரட்டி ராம்குமார் தனது காதலைச் சொல்லி வந்தாலும், சுவாதி அவனை சீண்டவில்லை என்று கூறப்படுகின்றது.
- முகநூல் (பேஸ்புக்) மூலம் ராம்குமார்-சுவாதி இருவருக்கும் அறிமுகம் ஏற்பட்டிருக்கலாம் என்றும் அறியப்படுகின்றது.
(மேலும் செய்திகள் தொடரும்)
