புதுடெல்லி, மார்ச் 18- தற்போது ஐ.நா. மனித உரிமை மன்றத்தில், இலங்கை அரசுக்கு எதிராக அமெரிக்கா ஒரு தீர்மானத்தை கொண்டு வந்துள்ளது.
இந்த தீர்மானத்தின் மீதான வாக்கெடுப்பு 21-ம் தேதி நடைபெறும்போது, இந்தியா இலங்கைக்கு எதிராக வாக்களிக்க வேண்டிய நெருக்கடி ஏற்பட்டுள்ளது. அந்த தீர்மானத்தை வலுவானதாக்கி இந்தியா ஆதரிக்க வேண்டும் என்று தமிழக அரசியல் கட்சிகள் வலியுறுத்தி வருகின்றன.
இந்த கோரிக்கையை ஏற்காவிட்டால் ஆளும் ஐ.மு. கூட்டணியில் இருந்து விலக நேரிடும் என்று தி.மு.க. தலைவர் கருணாநிதி (படம்) கூறியிருந்தார். இதனையடுத்து அவருடன் மத்திய மந்திரிகள் ப.சிதம்பரம், குலாம் நபி ஆசாத் இன்று ஆலோசனை நடத்தினர்.
இத்தகைய சூழ்நிலையில், மார்ச் 23-ம் தேதி தொடங்குவதாக இருந்த இந்தியா-இலங்கை நாடுகளின் பாதுகாப்புத்துறை செயலர் நிலையிலான பேச்சுவார்த்தையை இந்தியா ரத்து செய்துள்ளது. இந்த பேச்சுவார்த்தை எப்போது நடைபெறும் என்று அறிவிக்கப்படவில்லை.
