கோலாலம்பூர் – இன்று வெள்ளிக்கிழமை மாலை காவல் துறையினர் மேற்கொண்ட சோதனை மற்றும் கைது நடவடிக்கைகளால் தாங்கள் சோர்ந்து விடவில்லை என்றும் மாறாக, முன்பைவிட வீறுகொண்டு கூடுதலான மக்கள் சாலைகளில் திரள்வார்கள் என்றும் பெர்சே ஏற்பாட்டாளர்கள் சூளுரைத்துள்ளனர்.
நாளை சனிக்கிழமை நடைபெறும் பெர்சே 5.0 பேரணி தொடர்பில் இறுதி நிலவரங்கள் பின்வருமாறு:
- பல சாலைகள் மூடப்படும் என்றும் மேலும் பல சாலைகள் வழிமாற்றி விடப்படும் என்றும் காவல் துறையினர் அறிவித்துள்ளனர்.
- மெர்டேக்கா சதுக்கம் காவல் துறையின் கட்டுப்பாட்டில் கொண்டுவரப்பட்டு, அங்கு பொதுமக்கள் நுழைய தடை செய்யப்பட்டுள்ளது.
- பெர்சே பேரணி ஆதரவாளர்கள் கைது செய்யப்பட்டால் அவர்களுக்கு சட்ட உதவி வழங்க வழக்கறிஞர் மன்றத்தின் சார்பில் சுமார் 100 வழக்கறிஞர்கள் தயார் நிலையில் உள்ளனர்.
- தற்போது ஒரு மாநாட்டுக்காக சூடானில் இருக்கும் முன்னாள் பிரதமர் துன் மகாதீர், இறுதி நேரத்தில் பெர்சே பேரணியில் கலந்து கொள்ள நாடு திரும்ப முயற்சி செய்வார் என்றும் அறிவிக்கப்பட்டுள்ளது.
- பெர்சே போன்ற பேரணிகளை நடத்துவதன் மூலம்தான் எங்களால் நஜிப்பை பதவியில் இருந்து விலகச் சொல்லி வற்புறுத்த முடியும், மற்றபடி எங்களுக்கு வேறு வழி தெரியவில்லை என்றும் மகாதீர் தெரிவித்துள்ளார்.
