சென்னை – அதிமுக துணைப் பொதுச் செயலாளர் டிடிவி தினகரன் அணியைச் சேர்ந்த 19 அதிமுக சட்டமன்ற உறுப்பினர்கள், தமிழக முதல்வர் எடப்பாடி பழனிசாமியை பதவி நீக்கம் செய்ய வேண்டும் என தமிழக ஆளுநர் வித்யாசாகர் ராவிடம் கோரிக்கை மனு அளித்திருப்பதைத் தொடர்ந்து அவர்கள் கட்சிக் கட்டுப்பாட்டை மீறிவிட்டார்கள் என தமிழக சட்டமன்றத்தின் அதிமுக கொறடாவான இராஜேந்திரன் சட்டமன்ற அவைத் தலைவரிடம் தெரிவித்திருக்கிறார்.
இதனைத் தொடர்ந்து அந்த 19 பேரும் கட்சித் தாவல் தடை சட்டத்தின் கீழ் நீக்கப்பட அவைத்தலைவர் தனபால் எச்சரிக்கைக் கடிதம் (நோட்டீஸ்) அனுப்பியிருக்கிறார்.
அந்த 19 பேரும் தமிழக சட்டமன்றத்திலிருந்து நீக்கப்பட்டால், அதன் காரணமாக தமிழக அரசு கவிழுமா? எடப்பாடியும் பன்னீர் செல்வமும் தொடர்ந்து தங்களின் பெரும்பான்மையை நிலைநிறுத்த முடியுமா? என்பது போன்ற கேள்விகளோடு தமிழக அரசியல் களத்தில் மீண்டும் பரபரப்பு கூடியுள்ளது.
