கோலாலம்பூர் – நேற்று ஞாயிற்றுக்கிழமை, வடகொரியா நடத்திய அணு ஆயுதச் சோதனைக்கு மலேசியா கடும் கண்டனம் தெரிவித்திருக்கிறது.
இது குறித்து விஸ்மா புத்ரா வெளியிட்டிருக்கும் அறிக்கையில், “கடந்த 2006-ம் ஆண்டு முதல் தற்போது வரை வடகொரியா 6 முறை அணு ஆயுதச் சோதனைகளை நடத்தியிருக்கிறது. தற்போது நடத்தப்பட்டிருக்கும் அணு ஆயுதச் சோதனை உட்பட அனைத்துமே ஐக்கிய நாடுகளின் பாதுகாப்பு கவுன்சில் எடுத்திருக்கும் தீர்மானங்களை மீறுவது ஆகும்.”
“வடகொரியாவின் இந்த அத்துமீறும் செயல், உலகளவில் அமைத்திக்கும், பாதுகாப்பிற்கும் அச்சுறுத்தல் ஏற்பட்டிருக்கிறது.”
“இந்தச் சம்பவத்தை அறிந்து மலேசியா மிகவும் வருத்தமடைகின்றது. எனவே வடகொரியா இது போன்ற அணு ஆயுதச் சோதனைகளை நிறுத்திக் கொள்ளும் படி, விஸ்மா புத்ரா கடுமையாக வலியுறுத்துகிறது.” என்று விஸ்மா புத்ரா தெரிவித்திருக்கிறது.
