கோலாலம்பூர்: 5-வது அனைத்துலக யோக தினத்தை முன்னிட்டு மலேசிய இந்திய உயர் ஆணையம் ஜூன் மற்றும் ஜூலை மாதங்களில் பல்வேறு இடங்களில் யோகா கொண்டாட்டங்களை ஏற்பாடு செய்துள்ளது.
அவ்வகையில் வருகிற 23-ஆம் தேதி பத்து மலை கோயில் வளாகத்தில் காலை 7 மணிக்குத் தொடங்கி 9 மணிவரையிலும் இந்த யோகா தினம் கொண்டாடப்படவுள்ளது என்று இந்திய உயர் ஆணையம் தெரிவித்துள்ளது.
கடந்த ஆண்டுகளைப் போல இவ்வாண்டும் இந்திய உயர் ஆணையம் பல்வேறு உள்ளூர் சமூக அமைப்புகளுடன் இணைந்து இந்த கொண்டாட்டங்களை ஏற்பாடு செய்துள்ளது.
நேதாஜி சுபாஷ் சந்திரபோஸ் இந்திய கலாச்சார மையத்தின் யோகா ஆசிரியர் இந்த பயிற்சியை நடத்துவார் என ஆணையம் வெளியிட்டுள்ள அறிக்கையில் குறிப்பிட்டுள்ளது. சுமார் 2,000 மேற்பட்ட மக்கள் இந்த நிகழ்ச்சியில் கலந்து கொள்வர் என்று எதிர்பார்க்கப்படுகிறது.
இதனிடையே, 5-வது அனைத்துலக யோகா தினத்தை முன்னிட்டு இந்தியா ஜார்க்கண்ட் மாநிலம் ராஞ்சியில் நடைபெற்ற நிகழ்ச்சியில் இந்திய பிரதமர் நரேந்திர மோடி யோக பயிற்சியில் பங்கேற்றார். அவருடன் இணைந்து சுமார் 30,000 பேர் இந்த நிகழ்ச்சியில் கலந்து கொண்டு யோகா பயிற்சியில் ஈடுபட்டனர்.
