சென்னை: நடிகர் சிவகார்த்திகேயன் நடிப்பில் வெளிவர இருக்கும் திரைப்படம் ‘டாக்டர்’. இத்திரைப்படத்தின் முதல் தோற்றம் நேற்று திங்கட்கிழமை அவரது 35-வது பிறந்த நாளை முன்னிட்டு வெளியிடப்பட்டது.
தொலைக்காட்சி நிகழ்ச்சியில் தோன்றி பின்னர் நிகழ்ச்சி தொகுப்பாளராக உயர்ந்த சிவகார்த்திகேயன் 2012-ஆம் ஆண்டு மரினா திரைப்படம் மூலம் திரையுலகில் நுழைந்தார். தற்போது, இரசிகர்களின் பேராதரவு இவருக்கு கிடைத்திருப்பது குறிப்பிடத்தக்கது.
‘டாக்டர்’ திரைப்படத்தை ‘கோலமாவு கோகிலா’ திரைப்பட புகழ் இயக்குனர் நெல்சன் டிலிப்குமார் எழுதி இயக்கியுள்ளார். அவர் சிவகார்த்திகேயனின் நீண்டகால நண்பர் என்பது குறிப்பிடத்தக்கது.
படத்திற்கு அனிருத் இசையமைக்கவுள்ளார்.
‘டாக்டர்’ படத்தைத் தவிர, சிவகார்த்திகேயன் தனது 14- வது படத்திற்காக இயக்குனர் ஆர்.ரவிக்குமாருடன் இணைந்து பணியாற்றி வருகிறார்.
படத்திற்கு ‘அயலான்’ என்று பெயரிடப்பட்டுள்ளது. இப்படத்தில் சிவகார்த்திகேயனுக்கு ஜோடியாக ராகுல் ப்ரீத் சிங் முன்னணி வேடத்தில் நடிக்கவுள்ளார். அதே நேரத்தில் இப்படத்திற்கு ஏ.ஆர்.ரஹ்மான் இசையமைக்க இருப்பது குறிப்பிடத்தக்கது.
