கோலாலம்பூர்: அரசியல் எதார்த்தத்தை ஏற்றுக் கொண்டு ஜசெக “மாறிவிட்டது” மற்றும் “கோரிக்கையை குறைத்துவிட்டது” என்று முன்னாள் பிரதமர் டாக்டர் மகாதீர் முகமட் தெரிவித்தார்.
“எனது கருத்து மாறவில்லை, ஆனால், அவை மாறிவிட்டன” என்று டாக்டர் மகாதீர் இன்று வெள்ளிக்கிழமை கூறினார்.
ஜசெக என்றால் முன்னர் சீனர்கள்தான், ஆனால் இப்போது நிறைய மலாய்க்காரர் தலைவர்கள் மற்றும் உறுப்பினர்கள் இருப்பதாக மகாதீர் கூறினார்.
“மலாய்க்காரர்கள் இல்லாமல் வெல்ல முடியாது என்பதை அவர்கள் உணர வேண்டும். எனவே அவர்களின் கோரிக்கையை குறைத்துவிட்டனர்.”
“உண்மையில், ஜசெகவின் கோரிக்கைக்கு ஏற்ப கூட்டு தேர்வு சான்றிதழை (யுஇசி) அனுமதிக்க நாங்கள் விரும்பவில்லை என்று நாங்கள் கூறியபோது, அவர்கள் இறுதியாக ஒப்புக்கொண்டனர்.”
“வேறு பல ஜசெக கொள்கைகள் புறக்கணிக்கப்பட்டுள்ளன, எனவே இது எனது கருத்து அல்ல.”
பாஸ் கட்சி, இஸ்லாத்தை ஓர் அரசியல் கருவியாகப் பயன்படுத்துவது உம்மாவின் ஒற்றுமையை உடைக்கும் ஒரு மோசமான விஷயம் என்று டாக்டர் மகாதீர் கூறினார்.
“அவர்கள் என்னை ஆதரித்தாலும் நான் திருப்தியடையவில்லை, ஏனென்றால் இன்றுவரை அவர்கள் பாஸ் கட்சியில் அல்லாதவர்கள் முஸ்லிம்கள் அல்ல என்ற கருதுகிறார்கள்.”
“இது பாஸ் தலைமையின் மீதான எனது விரக்தி” என்று மகாதீர் கூறினார்.
பிரதமராக தொடர ஆரம்பத்தில் தன்னை ஆதரித்ததன் மூலமும், இறுதியில் மொகிதின் யாசினுக்கு ஆதரவளிப்பதன் மூலமும் பாஸ் தன்னைக் காட்டிக் கொடுத்தது என்றும் அவர் கூறினார்.
“எனவே அவர்கள் என்ன சொல்கிறார்கள், என்ன செய்கிறார்கள் என்பதன் அர்த்தம் என்ன? இது மிகவும் வெறுப்பாக இருக்கிறது.”
“அவர்களே இஸ்லாத்தின் போதனைகளை கடைபிடிப்பதில்லை. நாம் ஒரு வாக்குறுதியை அளிக்கும்போது, அந்த வாக்குறுதியை நாம் கடைப்பிடிக்க வேண்டும், ”என்று மகாதீர் கூறினார்.
