புத்ரா ஜெயா: இன்று சனிக்கிழமை (மே 9) நண்பகல் வரை மலேசியாவில் 54 புதிய பாதிப்புகள் அடையாளம் காணப்பட்டுள்ளன. இதைத் தொடர்ந்து கொவிட்19 பாதிப்படைந்தவர்களின் மொத்த எண்ணிக்கை 6,589-ஆக உயர்ந்திருக்கிறது.
கடந்த 24 மணி நேரத்தில் 65 பேர்கள் கொவிட்19 பாதிப்பிலிருந்து விடுபட்டு, இல்லம் திரும்பியிருக்கின்றனர். இதுவரையில் குணமடைந்தவர்களின் எண்ணிக்கை 4,929-ஆக உயர்ந்திருக்கிறது என்று சுகாதார அமைச்சின் முகநூல் பக்கத்தில் பதிவிடப்பட்டுள்ளது.
இத்தனை நாட்களாக ஓய்வின்றி பணியாற்றிய தாமும், சக பணியாளர்களும், இன்று ஒரு நாள் ஓய்வில் இருப்பதாக டாக்டர் நூர் ஹிஷாம் அப்துல்லா தமது டுவிட்டர் பக்கத்தில் பதிவிட்டுள்ளார்.
தற்போது நாடு முழுமையிலும் 1,552 பேர்கள் மருத்துவ மையங்களில் சிகிச்சை பெற்று வருகின்றனர். இவர்களில் 18 பேர்களுக்கு தீவிர சிகிச்சைப் பிரிவில் சிகிச்சை வழங்கப்படுகிறது. 6 பேர்கள் சுவாசக் கருவியின் உதவியோடு சிகிச்சை பெற்று வருகின்றனர்.
இன்று ஒருவர் மரணமடைந்துள்ள நிலையில், நாட்டில் மரண எண்ணிக்கை 108-ஆக அதிகரித்துள்ளது.
