கோலாலம்பூர்: நோயியல் நிபுணர் டாக்டர் ஆர்.குணசேகரன் உட்பட ஐந்து பேருக்கு, துணை அரசு வழக்கறிஞர் டத்தோ அந்தோணி கெவின் மொராய்ஸை கொலை செய்ததற்காக அண்மையில் மரண தண்டனை விதிக்கப்பட்டது.
நேற்று திங்கட்கிழமை அத்தண்டனைக்கு எதிராக அவர்கள் மேல்முறையீடு செய்துள்ளனர்.
ஆறு மேல்முறையீட்டாளர்கள் நேற்று இங்குள்ள மேல்முறையீட்டு நீதிமன்றத்தில் தங்கள் வழக்கறிஞர்கள் மூலம் மேல்முறையீட்டைத் தாக்கல் செய்தனர்.
வழக்கறிஞர் டத்தோ என்.சிவானந்தன், டாக்டர் குணசேகரனைப் பிரதிநிதித்தார். இதர ஐவரை டத்தோ சீலன் அர்ஜுனன் பிரதிநிதித்தார்.
ஐந்து ஆண்டுகளுக்கு முன்பு சிமிட்டி கொள்கலம் (டிரம்) ஒன்றில் கண்டெடுக்கப்பட்ட கெவின் மொராய்ஸைக் கொலை செய்த குற்றவாளிகள் என நிரூபிக்கப்பட்டதை அடுத்து கடந்த வெள்ளிக்கிழமை கோலாலம்பூர் உயர் நீதிமன்றம் டாக்டர் ஆர். குணசேகரன் மற்றும் ஐந்து பேருக்கு மரண தண்டனை விதித்தது.
நீதிபதி அஸ்மான் அப்துல்லா, குணசேகரன், 57; எஸ்.ரவி சந்தரன், 49; ஆர்.தினீஷ்வரன், 28; ஏ.கே.தினேஷ் குமார், 27; எம். விஸ்வநாத், 30, மற்றும் எஸ் நிமலன், 27 ஆகியோருக்கு இந்த தண்டனையை விதித்தார்.
குற்றம் சாட்டப்பட்ட 6 பேருக்கும் மொராய்ஸைக் கொல்ல ஒரு பொதுவான நோக்கம் இருந்ததாக நீதிபதி அஸ்மான் கண்டறிந்தார்.
அரசு தரப்பு வழக்கறிஞர் நியாயமான சந்தேகங்களை எழுப்பியிருக்கிறார். ஆனால், தற்காப்பு தரப்பு அதை தற்காக்கத் தவறிவிட்டது என்றும், சந்தேகமின்றி தனது வழக்கை நிரூபிப்பதில் அரசு தரப்பு வெற்றி பெற்றதாகவும் அஸ்மான் தீர்ப்பளித்தார்.
2006-ஆம் ஆண்டு ஏப்ரல் 6-ஆம் தேதியன்று விசாரணை தொடங்கியதில் இருந்து 14 சாட்சிகள் உட்பட மொத்தம் 84 சாட்சிகள் விசாரணைக்கு உட்படுத்தப்பட்டனர்.
இவர்கள் 6 பேரும், 2005-ஆம் ஆண்டு செப்டம்பர் 4-ஆம் தேதி அன்று காலை 7 மணி முதல் இரவு 8 மணி வரை, இங்குள்ள ஜாலான் டூத்தாமாஸ் ராயாவிலிருந்து, நம்பர் 1, ஜாலான் யுஎஸ்ஜே 1/6 டி, சுபாங் ஜெயாவுக்குச் சென்று கொண்டிருந்தபோது, 55 வயதான மொராய்ஸைக் கொன்றதாக குற்றம் சாட்டப்பட்டது.
அவர்கள் குற்றவியல் தண்டனைச் சட்டத்தின் கீழ் குற்றம் சாட்டப்பட்டனர்.
