சிரம்பான் – இங்குள்ள டேஃப் கல்லூரிக்கு மஇகா தேசியத் தலைவர் டான்ஸ்ரீ டத்தோஸ்ரீ ச.விக்னேஸ்வரன் நேற்று திங்கட்கிழமை (ஜூலை 20) வருகை தந்தார். டேஃப் கல்லூரி, மஇகாவின் எம்ஐஇடி அறவாரியத்தின் நிருவாகத்தின் கீழ் இயங்கும் ஒரு கல்விக் கூடமாகும்.
எம்ஐஇடி தலைவருமான விக்னேஸ்வரன் டேஃப் கல்லூரியின் வசதிகள், அங்கு இயங்கும் மாணவர்களுக்கான பரிசோதனைக் கூடங்கள் (labs) ஆகியவை குறித்து நேரடியாக பார்வையிட்டுத் தெரிந்து கொள்ள நேற்றைய வருகையை மேற்கொண்டார்.
அவருடன் நெகிரி மாநில மஇகா தலைவர் டத்தோ வேலு, கெடா மாநில மஇகா தலைவரும் எம்ஐஇடி அறவாரிய உறுப்பினர்களில் ஒருவருமான செனட்டர் டத்தோ ஆனந்தன், எம்ஐஇடி தலைமைச் செயல் அதிகாரி மும்தாஜ் ஆகியோரும் உடன் வருகை தந்தனர்.
டேஃப் கல்லூரியின் மூலம் வழங்கப்படும் கல்வித் தகுதிகள், பயிற்சிகள், கல்லூரியில் இருக்கும் வசதிகள் அனைத்தும் இன்றைய நவீன தொழில் துறையின் தேவைகளுக்கு ஏற்ப இருப்பதை எம்ஐஇடி நிருவாகம் தொடர்ந்து கண்காணித்து உறுதி செய்து வருகிறது. அவற்றை மேலும் மேம்படுத்துவது குறித்தும் எம்ஐஇடி தொடர்ந்து ஆய்வு செய்து வருகிறது.
இந்திய இளைஞர்களை தொழில்நுட்ப வல்லுநர்களாக உருவாக்கும் நோக்கில் செயல்படுகிறது டேஃப் கல்லூரி. 1997-ஆம் ஆண்டிலேயே ஐஎஸ்ஓ 9001;2000 தர நிர்ணயச் சான்றிதழ் பெற்றது டேஃப் தொழில்நுட்பக் கல்லூரி.
1972-ஆம் ஆண்டில் நெகிரி இன்ஸ்டிடியூட் ஆஃப் டெக்னோலோஜி (Negeri Institute of Technology) என்ற பெயரில் தொடங்கப்பட்டது இந்தக் கல்லூரி. 1988-ஆம் ஆண்டில் எம்ஐஇடி ( மாஜூ இன்ஸ்டிடியூட் ஆப் எடுகேஷனல் டெவலெப்மெண்ட் – Maju Institute of Educational Development) இந்தக் கல்லூரியை கையகப்படுத்தியது. டேஃப் கல்லூரி என்ற பெயர் மாற்றமும் செய்யப்பட்டது.
சிரம்பானில் இயங்கிவரும் டேஃப் கல்லூரி தீபகற்ப மலேசியாவின் தென் பகுதிகளில் வாழும் ஆர்வம் கொண்ட மாணவர்களுக்கு தொழில்நுட்பக் கல்வியை வழங்குவதில் முன்னணி வகிக்கிறது.
விக்னேஸ்வரனின் நேற்றைய வருகை தொடர்பான சில படக் காட்சிகளை இங்கே காணலாம்:
