கோலாலம்பூர்: பாங்சார் தேசிய பள்ளி இன்று முதல் அக்டோபர் 16 வரை மூடப்படும் என்று லெம்பா பந்தாய் நாடாளுமன்ற உறுப்பினர் பாஹ்மி பாட்சில் தெரிவித்தார்.
நேற்று தனது மாணவர்களிடையே இரண்டு கொவிட் 19 சம்பவங்களை பதிவு செய்ததை அடுத்து பள்ளி திறந்தே இருந்தது, ஆனால் மாணவர்கள் எவரும் பள்ளிக்கு வரவில்லை.
முன்னதாக, இது குறித்து பேசிய பெற்றோர்-ஆசிரியர் சங்கத்தின் தலைவர் முகமட் யாசிட் முகமட் யாசின், பள்ளி நிர்வாகம் இன்று 100 விழுக்காடு மாணவர்கள் பள்ளிக்கு வராததை உறுதிப்படுத்தியுள்ளது என்று கூறினார்.
காலை அமர்வுக்கு பள்ளியில் கிட்டத்தட்ட 800 மாணவர்கள் இருப்பதாக யாசிட் கூறினார்.
ஆசிரியர்கள் மற்றும் நிர்வாக ஊழியர்கள் மட்டுமே பள்ளிக்கு வந்துள்ளனர் என்று அவர் கூறினார்.
“நேற்று, சுகாதார அமைச்சு மாணவர்கள், ஆசிரியர்களை பரிசோதனை செய்யத் தொடங்கியது. இன்று, சுகாதார அதிகாரிகள் குறிப்பிட்ட பகுதிகளில் கூடுதல் சோதனைகளை மேற்கொள்வார்கள்.
“அனைத்து மாணவர்களும் பெற்றோர்களும் அறிவிக்கப்பட்டபடி சோதனைக்கு உட்படுத்தப்பட வேண்டும். ஆனால், கொவிட்19 தொற்றுக் கண்ட இரு மாணவர்களும் பெரிய கூட்டத்தில் இருந்ததால், இன்னும் அதிகமானவர்களை இது உள்ளடக்கியது” என்று அவர் கூறினார்.
நேற்று, பள்ளியில் நான்கு மற்றும் ஐந்தாம் ஆண்டு மாணவர்கள் கொவிட்19- க்கு சாதகமாக இருப்பதாக தெரிவிக்கப்பட்டது.
