கோலாலம்பூர்: நாளை வெள்ளிக்கிழமை (நவம்பர் 6) முதல் நாடாளுமன்ற அமர்வில் 80 நாடாளுமன்ற உறுப்பினர்கள் மட்டுமே ஒரே நேரத்தில் பங்கேற்க அனுமதிக்கப்படுவர்.
கொவிட் -19 தொற்று பரவுவதைத் தடுப்பதற்கான நடவடிக்கைகளின் ஒரு பகுதியாக இது கருதப்படுகிறது.
அரசாங்கத்தைச் சேர்ந்த 41 நாடாளுமன்ற உறுப்பினர்களும், எதிர்க்கட்சி மற்றும் சுயேச்சை நாடாளுமன்ற உறுப்பினர்கள் 39 பேரும் இந்த அமர்வில் கலந்து கொள்வர்.
அமர்வில் பங்கேற்கும் நாடாளுமன்ற உறுப்பினர்களை, அந்தந்த கட்சிகள் தீர்மானிக்கும் என்று மக்களவை சபாநாயகர் அசார் அசிசான் ஓர் அறிக்கையில் தெரிவித்தார்.
மேலும் கலந்துகொள்ளும் நபர்களுக்கு வருகை பதிவு செய்ய சிறப்பு அட்டை வழங்கப்படும்.
நேற்று நடைபெற்ற கொவிட் -19 தொற்றுநோய் பாதிப்பு சம்பந்தமாக கூட்டத்தில் இந்த முடிவு எடுக்கப்பட்டுள்ளது.
