கோலாலம்பூர்: தற்போதைய அமைச்சரவை, நம்பிக்கைக் கூட்டணி அமைச்சரவையை விட சற்று பெரியது என்று பிரதமர் துறை அமைச்சர் முகமட் ரெட்சுவான் யூசோப் இன்று மக்களவையில் கூறினார்.
மொகிதின் யாசினின் அமைச்சரவை அமைச்சர்கள் குறைக்கப்பட வேண்டும் என்றஅழைப்புக்கு அவர் இவ்வாறு பதிலளித்தார்.
அமைச்சரவையின் அளவு அமைச்சர்களின் எண்ணிக்கையை அடிப்படையாகக் கொண்டது என்றும் ரெட்சுவான் தெளிவுபடுத்தினார்.
“அமைச்சரவையில் 32 உறுப்பினர்கள் உள்ளனர். 70 பேர் அல்ல என்பதை நான் தெளிவுபடுத்த விரும்புகிறேன். துணை அமைச்சர்கள் அமைச்சரவையின் உறுப்பினர்கள் அல்ல.
“எனவே, அமைச்சரவை குறைக்கப்பட வேண்டிய அவசியமில்லை. தேசிய கூட்டணி அரசாங்கத்தில் உள்ள அமைச்சர்களின் எண்ணிக்கை நம்பிக்கைக் கூட்டணி நிர்வாகத்திலிருந்து சற்று குறைவானது, ” என்று அவர் கூறினார்.
அண்மையில் 2021 வரவு செலவு திட்டங்களை விவாதிக்கும் போது, அமைச்சரவையின் அளவு குறித்து கருத்து தெரிவித்த காலிட் சமாட் கருத்து குறித்து அவர் பதிலளித்தார்.
கொவிட் -19 தொற்றுநோய்க்கு மத்தியில் தேசிய கூட்டணி நிர்வாகத்தில் உள்ளவர்களின் கடமைகள் குறைக்கப்படவில்லை என்று ரெட்சுவான் கூறினார். அரசாங்க திட்டங்கள் தொடர்ந்து நடந்து கொண்டிருக்கின்றன என்று அவர் கூறினார்.
அமைச்சர்கள் ஊதியக் குறைப்பை ஏற்குமாறுடாக்டர் மகாதீர் முகமட் உட்பட பல நாடாளுமன்ற உறுப்பினர்களின் அழைப்புகளுக்கு பதிலளித்த ரெட்சுவான், அமைச்சர்களும் அவர்களது பிரதிநிதிகளும் ஏற்கனவே இரண்டு மாத சம்பளத்தை கொவிட் -19 நிதிக்கு நன்கொடையாக அளித்துள்ளனர் என்று கூறினார்.
