கோலாலம்பூர்: அவசரகால அறிவிப்பு குறித்து மாமன்னருக்கு ஆலோசனை வழங்குவதற்கு முன்னர் அதன் விதிமுறைகளை நம்பிக்கை கூட்டணி மதிப்பாய்வு செய்ய விரும்புவதாக கூறியுள்ளது.
“நாங்கள் முதலில் முழு விவரங்களை அறிய விரும்புகிறோம். குறிப்பு விதிமுறைகளையும், எத்தனை உறுப்பினர்கள் இருப்பார்கள் என்பதையும் நாங்கள் கவனிக்க வேண்டும். குறிப்பு விதிமுறைகளை நாங்கள் மறுபரிசீலனை செய்ய வேண்டும்,” என்று அமனா துணைத் தலைவர் சலாவுடின் அயூப் மலேசியாகினியிடம் தெரிவித்தார்.
எதிர்க்கட்சித் தலைவர் அலுவலகம் தகவல்களைப் பெற முயற்சிப்பதாக சலாவுடின் கூறினார். விவரங்கள் கிடைக்கும்போது எதிர்க்கட்சி கூட்டம் நடத்தும் என்றார்.
“நாங்கள் காத்திருந்து பார்ப்போம்,” என்று அவர் கூறினார்.
கொவிட் -19 தொற்றுநோயை எதிர்த்துப் போராட அரசாங்கத்திற்கு உதவ அவசரநிலை அறிவிப்பு தேவை என்று பிரதமர் மொகிதின் யாசின் கூறினார். எவ்வாறாயினும், மக்களவையில் பெரும்பான்மையினரின் ஆதரவை இழந்த பின்னர் அதிகாரத்தில் இருக்க மொகிதினின் திட்டம் இது என்று நம்பிக்கை கூட்டணி கருதுகிறது.
முன்னதாக, மொகிதின் யாசின் தலைமையிலான தேசியக் கூட்டணி அரசாங்கம் கொண்டு வந்திருக்கும் அவசரகாலப் பிரகடனத்தை எதிர்த்து அன்வார் இப்ராகிம் வழக்கு தொடுக்கவிருப்பதாக தெரிவித்திருந்தார்.
இதற்கு முன்னர் அவசரகாலப் பிரகடனத்தை இரத்து செய்ய வேண்டுமென மாமன்னரை வலியுறுத்துங்கள் என்று அன்வார் நாடாளுமன்ற உறுப்பினர்களுக்கு அறைகூவல் விடுத்திருந்தார்.
மாமன்னர் அவசர காலப் பிரகடனத்தை இரத்து செய்து உத்தரவிடுவார் எனவும் விரைவிலேயே நாடாளுமன்றக் கூட்டத்தைக் கூட்டி அவசர காலம் தேவையா என்பதை விவாதிக்க வழிவிடுவார் என்றும் அன்வார் நம்பிக்கை தெரிவித்தார்.
நாட்டின் அரசியலமைப்பு சட்டத்தையும், மக்களின் உரிமைகளையும் தற்காக்கும் விதமாக அவசர காலத்தை இரத்து செய்ய மாமன்னருக்கு மேல்முறையீடு செய்யும் அதே வேளையில், தனது சட்ட ஆலோசனைக் குழுவினர் வழக்கு தொடுப்பதற்கான ஆயத்தங்களைச் செய்து வருவதாகவும் அன்வார் தெரிவித்தார்.
