கோலாலம்பூர்: இன்று வியாழக்கிழமை ஜூலை 15 வரையில் கடந்த 24 மணி நேரத்தில் நாட்டில் மொத்தம் 13,215 புதிய தொற்றுகள் அதிர்ச்சி தரும் வகையில் அதிகரித்திருக்கின்றன.
நேற்றைய எண்ணிக்கையோடு ஒப்பிடும்போது ஒரே நாளில் 2 ஆயிரத்துக்கும் கூடுதலான தொற்றுகள் அதிகரித்திருப்பது அதிர்ச்சியை ஏற்படுத்தியிருக்கிறது.
இது வரலாறு காணாத உயர்வாகும். இந்த எண்ணிக்கையில் இதுவரையில் ஒருநாள் தொற்றுகள் பதிவாகியதில்லை.
இன்றைய எண்ணிக்கையோடு சேர்ந்து நாட்டில் இதுவரை பதிவான மொத்த தொற்றுகளின் எண்ணிக்கை 880,782 ஆக உயர்ந்திருக்கிறது.
மாநிலங்களைப் பொறுத்தவரையில் முதல் இடத்தில் வழக்கம்போல் சிலாங்கூர் இருக்கிறது. 6,120 தொற்றுகளை சிலாங்கூர் பதிவு செய்திருக்கிறது. இதன் மூலம் 6 ஆயிரத்தைக் கடந்த தொற்றுகளைக் கொண்ட முதல் மாநிலமாக சிலாங்கூர் இருக்கிறது.
வழக்கம்போல் மொத்த தொற்றுகளில் ஏறத்தாழ பாதி எண்ணிக்கையிலான தொற்றுகள் சிலாங்கூரில் பதிவாகியிருக்கின்றன.
சிலாங்கூருக்கு அடுத்த நிலையில் 1,603 தொற்றுகளோடு நெகிரி செம்பிலான் இரண்டாவது இடத்தைப் பிடித்திருக்கிறது.
வழக்கமாக 2-வது இடத்தில் இருந்து வந்த கோலாலம்பூர் 1,499 தொற்றுகளோடு மூன்றாவது இடத்தில் இருக்கிறது
