Home நாடு “பினாங்கு தமிழ்ப்பள்ளிகளில் மாணவர் பற்றாக்குறை- உடனடி கவனம் தேவை” – சுந்தரராஜூ அறைகூவல்

“பினாங்கு தமிழ்ப்பள்ளிகளில் மாணவர் பற்றாக்குறை- உடனடி கவனம் தேவை” – சுந்தரராஜூ அறைகூவல்

251
0
SHARE
Ad

ஜோர்ஜ் டவுன் : பினாங்கில் உள்ள தமிழ்ப் பள்ளிகளை (SJKT) பாதிக்கும் பிரச்சினைகளில் மாணவர் பற்றாக்குறையும் ஒன்றாகும். இந்த விவகாரம் உடனடியாகக் கவனிக்கப்பட வேண்டும் என பினாங்கு வீட்டுவசதி மற்றும் சுற்றுச்சூழல் ஆட்சிக் குழுவின் தலைவர் டத்தோஸ்ரீ சுந்தரராஜூ சோமு அறைகூவல் விடுத்தார்.

பினாங்கு தமிழ்ப் பள்ளிகள் குழுத் தலைவரான சுந்தரராஜு, மாணவர்களின் எண்ணிக்கையில் சரிவைச் சந்தித்த பள்ளிகள் அதிக மக்கள்தொகை கொண்ட பகுதிகளுக்கு மாற்றப் பட வேண்டும்.  இதனால் மாணவர் சேர்க்கை முந்தைய நிலைக்கு அதிகரிக்கப்படலாம் எனவும் தெரிவித்தார்.

“தமிழ்ப் பள்ளிகளில் மாணவர் சேர்க்கையை அதிகரிப்பதே எங்கள் நம்பிக்கை, ஏனென்றால் தமிழ்ப் பள்ளிகளின் வரலாறு தோட்டங்களில் இருந்து தொடங்கியது என்பதை நாங்கள் அறிவோம். இன்று என்ன நடக்கிறது என்றால், இந்த (தோட்ட) நிலங்கள் இப்போது இல்லை, ஆனால் பள்ளிகள் இன்னும் உள்ளன. எனவே, பள்ளிகள் இருக்கும்போது, ​​​​ஆசிரியர்கள் இருக்கிறார்கள், ஆனால் மாணவர்கள் இல்லை, ஏனெனில் தோட்டங்கள் இனி இல்லை, இது ஒரு பெரிய பிரச்சினையாக மாறும். ஏனெனில் குடியிருப்பாளர்களின் இடம் பெயர்வுடன் இணைந்து இந்தப் பகுதிகளில் உள்ள பள்ளிகளை நகர்த்த வேண்டும்.” என்று அவர் விளக்கினார்.

#TamilSchoolmychoice

பினாங்கு மாநிலத் தமிழ்ப் பள்ளிகள் குழு மற்றும் மலேசியப் பள்ளி முதல்வர்கள் பேரவை, பெற்றோர் ஆசிரியர் சங்கம், பள்ளிகளின் ஆட்சிக்குழு, தனியார் பாலர் பள்ளி ஆசிரியர்களுக்கு இடையே நேற்று ஞாயிற்றுக்கிழமை (அக்டோபர் 30) நடைபெற்ற சந்திப்புக் கூட்டத்தில் சுந்தரராஜு இவ்வாறு கூறினார்.

பினாங்கில் தற்போது 28 தமிழ்ப் பள்ளிகள் உள்ளன என்றும், மாணவர்கள் பற்றாக்குறை உள்ள பள்ளிகளை எளிதில் மாணவர்கள் அணுகக்கூடிய மற்றொரு இடத்திற்கு மாற்றுவதற்கு நிலத்தை கையகப்படுத்துவதில் மாநில அரசு தனது பங்களிப்பை வழங்கும் என நம்புவதாகவும் சுந்தரராஜூ கூறினார்.

“உதாரணமாக, புக்கிட் மெர்தாஜம் தமிழ்ப் பள்ளியில் 600 மாணவர்கள் இருந்தனர், ஆனால் 300 மாணவர்கள் மட்டுமே தற்போது எஞ்சியுள்ளனர். ஏனெனில் பலருக்கு போக்குவரத்து வசதி இல்லை, அவர்கள் இப்போது பள்ளியிலிருந்து வெகு தொலைவில் வசிக்கின்றனர்” என்று அவர் கூறினார்.

மாணவர்களின் பற்றாக்குறையைத் தவிர, தமிழ்ப் பள்ளிகளின் உள்கட்டமைப்பு வசதிகள் ஆகியவையும்  மிகவும் உகந்த கற்பித்தல் மற்றும் கற்றல் சூழலுக்கும் தமிழ்ப் பள்ளிகள் மேம்படுத்தப்பட வேண்டும் என்றும் அவர் கூறினார்.

தமிழ்ப் பள்ளிகளுக்காக அறக்கட்டளை

இந்திய மாணவர்களின் கல்வி மேம்பாட்டிற்காக நிதி திரட்ட ஓர் அறக்கட்டளையை நிறுவுவதுடன், தற்போது தமிழ்ப் பள்ளிகளுக்கான மொத்த ஒதுக்கீடான 2 மில்லியன் ரிங்கிட்டை ஆண்டுக்கு குறைந்தபட்சம் RM2.8 மில்லியனாக அதிகரிக்க வேண்டும் என்ற கோரிக்கைகளை முதலமைச்சர் சௌ கோன் இயோவிடம் முன்வைப்பதாக சுந்தரராஜு கூறினார். .