மே 3 – இணைய வர்த்தகத்தில் முன்னணியில் இருக்கும் அமெரிக்காவின் ‘அமேசான்’ (Amazon) நிறுவனம் ஆப்பிள் மற்றும் சாம்சங் திறன்பேசிகளுக்குப் போட்டியாக தனது புதிய முப்பரிமாணத் திரையுடன் கூடிய திறன்பேசிகளை உருவாக்கி வந்தது. தற்போது அதன் புகைப்படங்கள் இணையதளங்களில் வெளியாகி உள்ளது.
அமேசான் திறன்பேசிகளின் சிறப்பு அம்சங்கள் பற்றி தொழில்நுட்ப வலைத்தளங்கள் கூறியிருப்பதாவது:-
“இந்த திறன்பேசிகளானது 4.7 அங்குல அளவுடையதும், 1280 x 720 பிக்சல் தீர்மானம் கொண்ட முப்பரிமாணத் தொடுதிரையுடன் உருவாக்கப்பட்டுள்ளது. மேலும், இந்த திறன்பேசியானது 2 GB முதன்மை நினைவகம் (RAM) மற்றும் Snapdragon quad-core செயலி (Processor) ஆகியவற்றினைக் கொண்டதாக வடிவமைக்கப்பட்டுள்ளது” என்று குறிப்பிட்டுள்ளன.
ஆண்டிராய்டை அடிப்படையாகக் கொண்டு உருவாக்கப்பட்டுள்ள ‘அமேசான் ஃபயர்’ (Amazon Fire) இயங்குதளத்தில் இந்த திறன்பேசிகள் இயங்க உள்ளதாக கூறப்படுகின்றது.
