நியூயார்க், ஜூன் 9 – ஐ.நா. மனித உரிமைகள் ஆணையத்தின் புதிய தலைவராக ஜோர்டான் நாட்டு தூதர் பிரின்ஸ் ஜீட் ராட் ஜீட் அல்-ஹுசேன் நியமனம் செய்யப்பட்டுள்ளார்.
ஐக்கிய நாடுகள் சபையின் மனித உரிமைகள் ஆணையத்தின் தலைவராக இருந்த நவநீதம் பிள்ளையின் பதவிக்காலம் நிறைவடைந்ததைத் தொடர்ந்து, ஐ.நா. பொதுச் செயலாளர் பான்-கீ-மூன், ஐ.நா. உறுப்பு நாடுகளின் தலைவர்களுடன் ஆலோசித்த பின்னர் அல்-ஹுசேனை புதிய தலைவராக நியமித்தார்.
புதிய ஆணையராக நியமிக்கப்பட்டுள்ள அல்-ஹுசேன் (50), கேம்பிரிட்ஜ் பல்கலைக்கழகத்தில் முனைவர் பட்டம் பெற்றவர். இவர் ஜோர்டான் நாட்டுக்கான ஐ.நா.சபையின் நிரந்தர உறுப்பினராக பதவி வகித்து வந்தார். முன்னதாக இதே பதவியை 2000 முதல் 2007ஆம் ஆண்டு வரை ஆறரை ஆண்டுகள் வகித்தார்.
மேலும், 2007 முதல் 2010-ம் ஆண்டு வரை அமெரிக்கா மற்றும் மெக்ஸிகோ நாடுகளுக்கான ஜோர்டான் நாட்டுத் தூதராகவும் அவர் பதவி வகித்துள்ளார்.
ஐ.நா. மனித உரிமைகள் ஆணையராக, கடந்த 2008-ம் ஆண்டு நியமிக்கப்பட்ட நவநீதம் பிள்ளையின் பதவிக்காலம், 2012-ம் ஆண்டுடன் முடிவடைந்தது. இந்நிலையில் அவரது பதவிக்காலம் 2014-ம் ஆண்டு ஜூன் வரை நீட்டிக்கப்பட்டிருந்தது குறிப்பிடத்தக்கது.
