கிளாஸ்கோ, ஆகஸ்ட் 4 – நடப்பு காமன்வெல்த் போட்டிதிருவிழா இன்றுடன் நிறைவடைகிறது. 20-வது காமன்வெல்த் விளையாட்டு போட்டித் தொடர் கடந்த 23-ம் தேதி ஸ்காட்லாந்தின் கிளாஸ்கோ நகரில் கோலாகலமாக தொடங்கியது.
இங்கிலாந்து ராணி இரண்டாம் எலிசபெத் போட்டியை தொடங்கி வைத்தார். 71 நாடுகளை சேர்ந்த 4,500 வீரர், வீராங்கனைகள் பங்கேற்று பதக்க வேட்டையில் ஈடுபட்டனர்.
இந்நிலையில் காமன்வெல்த் போட்டி இன்றுடன் நிறைவடைகிறது. நிறைவு விழா மலேசிய நேரப்படி காலை 4.00 மணிக்கு தொடங்குகிறது. 2 ஆயிரத்திற்கும் மேற்பட்ட கலைஞர்கள் ஹம்ப்டன் மைதானத்தில் கலை நிகழ்ச்சிகளை நடத்தி காண்பிக்க உள்ளனர்.
ஆஸ்திரேலியாவின் பிரபல பாடகி 46 வயதான கைலி மினோக்கும் ரசிகர்களை கவர உள்ளார். இன்றும் சில போட்டிகள் நடக்க உள்ளன. பேட்மிண்டன், சைக்கிள் பந்தயம், ஹாக்கி, ஸ்குவாஷ் ஆகிய போட்டியின் இறுதி சுற்றுகள் நடக்கின்றன.
காமன்வெல்த் விளையாட்டுப் போட்டியில் இந்தியா 15 தங்கம் உட்பட 64 பதக்கங்களுடன், பதக்கபட்டியலில் 5-வது இடத்தில் நீடிக்கிறது. பதக்கப்பட்டியலில் 58 தங்கம், 59 வெள்ளி, 57 வெண்கலம் என 174 பதக்கங்களுடன் இங்கிலாந்து முதலிடத்தில் உள்ளது.
இதனையடுத்து 49 தங்கம், 42 வெள்ளி, 46 வெண்கலம் என 137 பதக்கங்களை கைப்பற்றியுள்ள ஆஸ்திரேலியா பதக்கப் பட்டியலில் 2-வது இடத்தில் நீடிக்கிறது. கனடா வீரர்கள் 32 தங்கம் உட்பட 82 பதக்கங்களுடன் 3-வது இடத்தில் உள்ளனர்.
போட்டியை நடத்தும் ஸ்காட்லாந்து 19 தங்கப் பதக்கங்களுடன் 53 பதக்கங்களை கைப்பற்றி 4-வது இடத்தில் உள்ளது. 6 தங்கம், 7 வெள்ளி, 6 வெண்கலம் என மொத்தம் 19 பதக்கங்களுடன் மலேசியா 12-வது இடத்தில் உள்ளது.
