கோலாலம்பூர், மே 25 – மலேசியா-தாய்லாந்து எல்லையில் மீண்டும் நூற்றுக்கணக்கான சடலங்கள் கண்டுபிடிக்கப்பட்டுள்ளன. கொலை செய்து புதைக்கப்பட்டவர்கள் ரோஹின்யா குடியேறிகளாக இருக்க அதிக வாய்ப்புள்ளதால், தென் கிழக்கு ஆசிய நாடுகளில் ஏற்கனவே பெரும் சர்ச்சையை ஏற்படுத்தி வரும் அகதிகள் விவகாரம் மீண்டும் உச்சகட்டத்தை எட்டி உள்ளது.
தாய்லாந்து நாட்டு எல்லையை ஒட்டியுள்ள மலேசிய நிலப்பரப்பில் சமீப காலமாக மியான்மர் மற்றும் வங்கதேச நாடுகளைச் சேர்ந்த அகதிகளின் சடலங்கள் தொடர்ந்து மீட்கப்பட்டு வருகின்றன. கடந்த சில வாரங்களுக்கு முன்னாள் சொங்காலா என்ற இடத்தில், ரப்பர் தோட்டம் ஒன்றில் இருந்து 30-க்கும் மேற்பட்ட சடலங்கள் மீட்கப்பட்டன. இந்நிலையில் பாடாங் பெசாரில் கடந்த சில நாட்களுக்கு முன்னாள் மீண்டும் நூற்றுக்கணக்கான சடலங்கள் கண்டுபிடிக்கப்பட்டுள்ளன.
இங்கு கொல்லப்பட்டவர்கள் ரோஹின்யா குடியேறிகள் தானா என காவல்துறையினர் ஆய்வு செய்து வருகின்றனர். இது தொடர்பாக மலேசிய உள்துறை அமைச்சர் அகமட் ஷாகித் ஹமிது கூறுகையில், “கடத்தல்காரர்களின் முகாம்கள் இங்கு சுமார் 5 வருட காலமாக இருந்திருக்க வாய்ப்புள்ளது. கொல்லப்பட்டவர்களின் சடலங்களை மீட்டு வருகின்றோம். சுமார் 17 இடங்களில் இது போன்ற புதை குழிகள் கண்டுபிடிக்கப்பட்டுள்ளன. விசாரணை முடிந்தவுடன் அனைத்து தகவல்களும் அதிகாரப்பூர்வமாக வெளியிடப்படும்” என்று தெரிவித்துள்ளார்.
