லண்டன், ஜூன் 12 – டிராகுலா, லார்ட் ஆப் த ரிங்ஸ் பாத்திரங்களின் மூலம் அழியாப் புகழ் பெற்ற பிரிட்டிஷ் நடிகர் கிறிஸ்டோபர் லீ, லண்டனில் 93-ஆவது வயதில் காலமானார்.
டிராகுலா எனும் பெயரைக் கேட்டால் இன்றைக்கும் நடுங்கும் அளவிற்கு ரத்தம் குடிக்கும் காட்டேரியாகத் திரையில் தாக்கத்தை ஏற்படுத்தியவர் கிறிஸ்டோபர் லீ. 1950-களின் பிற்பகுதியில் வெளியான படங்களில் டிராகுலாவாக ரசிகர்களை இருக்கையின் விளிம்பில் அமர வைத்தவர்.
ஜெம்ஸ் பாண்ட், லார்ட் ஆப் த ரிங்ஸ் படங்களில் வில்லனாகவும் கலக்கினார்.
கிறிஸ்டோபர் லீ என்றாலே கொடூரமான ஒரு வில்லன் எனும் எண்ணத்தை அவர் ஏற்படுத்தியிருந்தார்.
உலகளவில் மிகவும் புகழ் பெற்ற ஒரு வில்லனாக இருந்த அவர் நகைச்சுவை நடிகராகவும் நடித்துள்ளார். இவர் கடந்த ஞாயிற்றுக்கிழமை அன்று காலமான போதும், 4 நாட்களுக்குப் பிறகே அந்தச் செய்தியை வெளியிட்டுள்ளனர் அவரது குடும்பத்தினர்.
