புத்ராஜெயா : இன்று புதன்கிழமை (மார்ச் 12) மேல்முறையீட்டு நீதிமன்றம் 2-1 என்ற அளவில் பிளவுபட்ட தீர்ப்பை முன்னாள் பிரதமர் நஜிப் அப்துல் ரசாக்குக்கு சாதகமாக வழங்கியுள்ளது. இதன் மூலம் மீதமுள்ள சிறைத் தண்டனையை வீட்டுக் காவலில் கழிப்பதற்கான வாய்ப்பை நோக்கி அவர் மேலும் ஒருபடி நெருங்கியுள்ளார்.
நஜிப், தனது மீதமுள்ள சிறைத் தண்டனையை வீட்டுக் காவலில் கழிக்க அனுமதிக்கும் முந்தைய யாங் டி-பெர்துவான் அகோங்கின் பின் இணைப்பு உத்தரவை நிறைவேற்றுமாறு அரசாங்கத்தைக் கட்டாயப்படுத்த கோலாலம்பூர் உயர் நீதிமன்றத்தில் வழக்கு தொடுத்தார். அந்த பின் இணைப்பு உத்தரவை விசாரிக்க அனுமதி வழங்குமாறு நீதிமன்றத்தைக் கேட்டுக் கொண்டார். எனினும் உயர்நீதிமன்றம் கடந்த ஆண்டு ஜூலை 3-ஆம் தேதி அந்த வழக்கைத் தள்ளுபடி செய்தது.
அதைத் தொடர்ந்து மேல்முறையீட்டு நீதிமன்றத்திற்கு நஜிப் மேல்முறையீடு செய்தார்.
மேல்முறையீட்டு நீதிமன்றம், நீதிமன்ற மறுஆய்வுக்கான அனுமதியை மறுத்த முந்தைய உயர் நீதிமன்றத்தின் தீர்ப்பை ரத்து செய்துள்ளது.
இருப்பினும், இதன் பொருள் நஜிப் உடனடியாக வீட்டிற்குச் சென்று அங்கு தனது தண்டனையைக் கழிக்க முடியும் என்பதல்ல.
மாறாக, இந்த தீர்ப்பு, நஜிப்பின் வழக்கின் தகுதிகளைக் கேட்க நீதிமன்றம் ஒப்புக்கொண்டுள்ளது என்பதாகும்.
மீண்டும் அந்த வழக்கு உயர்நீதிமன்றத்திற்கு அனுப்பப்பட்டு அதனை விசாரிக்க தகுதிகள் உள்ளனவா என்பதை உயர்நீதிமன்றம் முடிவு செய்யவேண்டும். அவ்வாறு மறுஆய்வு செய்து மாமன்னரின் பின் இணைப்பு உத்தரவு உண்மைதான் என நீதிமன்றம் முடிவு செய்தால் மட்டுமே நஜிப் தனக்கான வீட்டுக் காவலைத் தொடர முடியும்.
இதன் பொருள் நஜிப் இன்னும் ஒரு தடையைக் கடக்க வேண்டும் என்பதாகும்.
3 நீதிபதிகளைக் கொண்ட மேல்முறையீட்டு நீதிமன்றம் இன்று 2-1 என்ற பெரும்பான்மையில் இந்த விவகாரத்தை நீதிமன்ற மறுஆய்வின் தகுதிகளைக் கேட்பதற்காக உயர் நீதிமன்றத்திற்கு திருப்பி அனுப்பும்படி உத்தரவிட்டது.
நீதிபதிகள் ஏன் இந்த தீர்ப்பை வழங்கினர்?
நீதிபதி அசிசா நவாவி தலைமையிலான மூன்று நபர் கொண்ட மேல்முறையீட்டு அமர்வில் அசிசா, மேல்முறையீட்டை மறுக்கும் மாறுபட்ட தீர்ப்பை வழங்கினார்.
தனது மாறுபட்ட தீர்ப்பில், அசிசா, நஜிப்பிற்கு நீதிமன்ற மறுஆய்வு அனுமதியை மறுத்த கீழ் நீதிமன்றத்தின் தீர்ப்புடன் ஒப்புக்கொண்டார். நஜிப்பின் அரச பின்னிணைப்பு கோரிக்கையை ஆதரிக்கும் பல சத்தியப் பிரமாண ஆவணங்கள் செவிவழிச் செய்திகள் எனக் குறிப்பிட்டார்.
அதே சமயம் சக மேல்முறையீட்டு குழு நீதிபதிகள் மற்ற இருவர் அசாரி கமால் ராம்லி மற்றும் முகமட் பிருஸ் ஜாஃப்ரில் ஆகியோர் மேல்முறையீட்டை அனுமதிக்கும் நஜிப்புக்கு சாதகமான தீர்ப்பை வழங்கினர்.
அரச பின்னிணைப்பு என்பது எதைப் பற்றியது?
இன்றைய நீதிமன்ற விசாரணையின் மையத்தில் உள்ள அரச பின்னிணைப்பு, கடந்த ஆண்டு ஜனவரி 29 அன்று முந்தைய யாங் டி-பெர்துவான் அகோங் – பகாங்கின் சுல்தான் அப்துல்லா சுல்தான் அகமது ஷா – வழங்கியதாகக் கூறப்படுகிறது.
நஜிப்பின் மன்னிப்புக்கான முறையீட்டை விசாரித்த மன்னிப்பு வாரியம் நஜிப்பின் 12 ஆண்டு சிறைத் தண்டனை மற்றும் RM210 மில்லியன் அபராதத்தை ஆறு ஆண்டு காவல் காலம் மற்றும் RM50 மில்லியன் அபராதமாகக் குறைத்தது. முன்னாள் மாமன்னர் வழங்கிய அரச பின்னிணைப்பில் எஞ்சிய தண்டனைக் காலத்தை நஜிப் வீட்டுக் காவலில் கழிக்கலாம் என தெரிவிக்கப்பட்டிருந்தது. இந்தப் பின் இணைப்புத்தான் பல்வேறு சர்ச்சைகளுக்கும், நீதிமன்ற வழக்குகளுக்கும் வித்திட்டுள்ளது.
அரசாங்கம் இதுவரை பின்னிணைப்பு உள்ளதா என்பதை உறுதிப்படுத்த மறுத்துவிட்டது.
இன்றைய நீதிமன்ற விசாரணையின் போது, பகாங் அரண்மனையிலிருந்து ஒரு கடிதம் சமர்ப்பிக்கப்பட்டது. சுல்தான் அப்துல்லா, நஜிப் தனது மீதமுள்ள சிறைத் தண்டனையை வீட்டுக் காவலில் கழிக்க துணை ஆணையை வழங்கியதை அந்தக் கடிதம் உறுதிப்படுத்தியது.
இருப்பினும், மத்திய அரசாங்கத்தின் சார்பில் வாதாடிய அரசு வழக்கறிஞர் ஷம்சுல் போல்ஹசன், கடந்த ஆண்டு ஜனவரி 29 அன்று நடைபெற்ற மன்னிப்பு வாரியக் கூட்டம் நஜிப்புக்கான எந்த உத்தேச அரச பின்னிணைப்பையும் கையாளவில்லை என்று கூறினார்.
மாறாக, வாரியம் நஜிப்பின் சிறைத் தண்டனை மற்றும் அபராதத்தைக் குறைப்பது தொடர்பான அரச ஆலோசனையை மட்டுமே கையாண்டது என்றும் அவர் நீதிமன்றத்தில் தெரிவித்தார்.
உள்துறை அமைச்சர் சைபுதீன் நசுருதின் இஸ்மாயில் சொல்வது என்ன?
இன்று புதன்கிழமை (மார்ச் 12) மதியம் நடைபெற்ற செய்தியாளர் சந்திப்பில், உள்துறை அமைச்சர் சைபுடின் நசுத்தியோன் இஸ்மாயில், சிறைத்துறை நஜிப்பின் தண்டனை குறைக்கப்பட்டதற்கான அறிவுறுத்தல்களை மட்டுமே பெற்றதாகவும், நஜிப்புக்கு வீட்டுக் காவல் வழங்கும் அரச பின்னிணைப்பை ஒருபோதும் பெறவில்லை என்றும் உறுதிப்படுத்தினார்.
இனி அடுத்தது என்ன?
கோலாலம்பூர் உயர் நீதிமன்றம், நஜிப் கோரிய நீதிமன்ற மறுஆய்வின் தகுதிகளைக் கேட்பதற்கு ஒரு தேதியை நிர்ணயிக்கும்.
உயர் நீதிமன்றம் இறுதியில் நஜிப்புக்கு சாதகமாகத் தீர்ப்பளித்தால், அவர் மீதமுள்ள சிறைவாசத்தைத் தனது வீட்டில் கழிக்க முடியும். இல்லையெனில், அவர் சிறையில் தனது சிறைத் தண்டனையை தொடர வேண்டும். உயர்நீதிமன்றத்தில் மீண்டும் அவர் தோல்வியடைந்தால், மீண்டும் மேல்முறையீட்டு நீதிமன்றத்திற்கு மேல்முறையீடு செய்யலாம்.
ஆனால், நஜிப்பின் நீதிமன்ற சட்டப் போராட்டம் வீட்டுக் காவல் பிரச்சனையோடு முடிந்து விட வாய்ப்பில்லை. 1எம்டிபி சம்பந்தப்பட்ட RM2.27 பில்லியன் தொடர்புடைய நான்கு அதிகார விதிமீறல்கள், மற்றும் 21 பண மோசடி குற்றச்சாட்டுகளை உள்ளடக்கிய தனி குற்றவியல் வழக்கையும் அவர் எதிர்கொண்டுள்ளார். இந்த வழக்கு தற்போது கோலாலம்பூர் உயர் நீதிமன்றத்தில் விசாரணையில் உள்ளது.
