சென்னை – வடபழனியில் இன்று திங்கட்கிழமை அதிகாலை அடுக்குமாடிக் குடியிருப்பு ஒன்றில் ஏற்பட்ட தீவிபத்தில், 2 குழந்தைகள் உட்பட 4 பேர் மூச்சுத்திணறி உயிரிழந்தனர்.
மேலும் 5 பேர் மோசமான நிலையில், மருத்துவமனையில் அனுமதிக்கப்பட்டிருக்கின்றனர்.
தரைத்தளத்தில் இருந்த மின்சந்திப்புப் பெட்டியில் ஏற்பட்ட தீ, வாகன நிறுத்துமிடத்தில் பரவி 10 வாகனங்களை தீக்கிரையாக்கியது. அதன் புகை, அந்த 4 மாடி கட்டிடத்தின் முதல் இரண்டு தளம் முழுவதும் பரவி, அதிகாலையில் உறக்கத்தில் இருந்தவர்களை மூச்சுத்திணற வைத்திருக்கிறது.
இவ்விபத்தில் முதல் தளத்தில் வீட்டில் உறக்கத்தில் இருந்த மீனாட்சி (வயது 65), செல்வி (வயது 30), சஞ்சய் (வயது 3), சந்தியா (வயது 10) ஆகியோர் அடர்த்தியான புகையைச் சுவாசித்து மூச்சுத்திணறி உயிரிழந்தனர் என காவல்துறை தெரிவித்திருக்கிறது.
