ஜோத்பூர் – அரிய வகை கலைமான்களை வேட்டையாடிக் கொன்ற வழக்கில் கடந்த இரண்டு நாட்களாக சிறைவாசம் அனுபவித்து வந்த பிரபல இந்தி நடிகர் சல்மான் கானுக்கு ஜோத்பூர் நீதிமன்றம் இன்று சனிக்கிழமை 50 ஆயிரம் ரூபாய் பிணையில் (ஜாமீன்) வழங்கியது.
இன்று மாலை 7 மணிவாக்கில் சுதந்திர மனிதனாக அவர் மீண்டும் சிறையிலிருந்து வெளியே வருவார் என அவரது வழக்கறிஞர்கள் தெரிவித்திருக்கின்றனர்.
இனி அவர் வெளிநாடு செல்வதாக இருந்தால், நீதிமன்றத்தின் முன் அனுமதி பெற்றுத்தான் செல்ல முடியும் என்றும் நீதிமன்றம் நிபந்தனை விதித்துள்ளது.
சல்மானின் விடுதலை அறிவிக்கப்பட்டவுடன் அவரது இரசிகர்கள் ஆயிரக்கணக்கில் ஜோத்பூர் நீதிமன்றத்தின் முன்னும், ஜோத்பூர் சிறையின் முன்னும் மும்பையிலுள்ள அவரது இல்லமான கேலக்சி அடுக்குமாடி குடியிருப்பு முன்னும் குவியத் தொடங்கினர்.
