கோலத்திரெங்கானு: அம்னோ- பாஸ் கூட்டணி மலாய்க்காரர் அல்லாதவர்களுக்கு மிரட்டலாக அமையும் எனும் கருத்தினை, பாஸ் கட்சித் தலைவர் ஹாடி அவாங் மறுத்துள்ளார்.
மலாய்க்காரர்களின் ஒற்றுமை, அரசியல் வேறுபாடு காரணத்தினால் வீழ்ந்து விடக்கூடாது எனும் நோக்கத்தினால்தான் அம்னோ- பாஸ் மட்டுமல்லாமல் பெர்சாத்து கட்சியுடனும் இணைந்து செயல்பட, பாஸ் தயாராக உள்ளது என அவர் கூறினார்.
அம்னோ- பாஸ் கூட்டணி மலாய்க்காரர் அல்லாதவர்கள் மீது தொடுக்கப்படும் போர் என நிதி அமைச்சர் கருத்துரைத்ததற்கு அவர் இவ்வாறு கூறினார்.
இதுகாறும், மலேசிய நாட்டில் இதர இனத்தாரின் நம்பிக்கைகளையும், மொழிகளையும் அனுமதித்த மலாய்க்காரர்களின் மனதை எல்லோரும் பாராட்ட வேண்டும் என அவர் குறிப்பிட்டார். எந்தக் காரணத்தைக் கொண்டும் முஸ்லிம் அல்லாதவர்களுக்கு அம்னோ- பாஸ் கூட்டணி அச்சுறுத்தலாக இருக்காது என அவர் உறுதியாகக் கூறினார்.
மேலும், தென்கிழக்காசிய நாடுகளுடன் ஒப்பிடுகையில், மலேசியாவில் பிற இனத்தவர்கள் நிம்மதியாகவும், கூடுதல் உரிமைகளுடனும் வாழ்கிறார்கள் என அவர் தெரிவித்தார். இதற்காக, இவர்கள் நன்றியுடன் இருக்க வேண்டும் எனத் தெரிவித்தார்.
