Home One Line P1 சபா தேர்தல்: தொகுதிகளின் எண்ணிக்கையை அம்னோ நாளை தீர்மானிக்கும்

சபா தேர்தல்: தொகுதிகளின் எண்ணிக்கையை அம்னோ நாளை தீர்மானிக்கும்

98
0
SHARE

கோத்தா கினபாலு: நாளை நடைபெறும் கட்சிக் கூட்டத்தில் அடுத்த மாநில தேர்தலில் போட்டியிடும் மாநில சட்டமன்ற தொகுதிகளின் எண்ணிக்கையை சபா அம்னோ தீர்மானிக்கும் என்று மாநில அம்னோ தொடர்புக் குழுத் தலைவர் டத்தோஸ்ரீ புங் மொக்தார் ராடின் தெரிவித்தார்.

தேர்தலில் போட்டியிட்ட அனைத்து தொகுதிகளையும் வெல்லும் முயற்சியில் அம்னோ மற்றும் தேசிய முன்னணியின் அடுத்தக்கட்ட நடவடிக்கைகளையும் இந்த சந்திப்பில் தீர்மானிக்கப்படும் என்று அவர் கூறினார்.

“என்னைப் பொறுத்தவரை, இது அனைத்து தொகுதிகளுக்கும் போட்டியிடுவதற்கான கேள்வி அல்ல. ஆனால், நாம் (அம்னோ சபா) எவ்வளவு வெல்ல முடியும் என்ற கேள்வி” என்று இன்று அவர் கூறினார்.

எவ்வாறாயினும், தனது கட்சியில் ஏற்கனவே வேட்பாளர்களின் பட்டியல் உள்ளது என்று அவர் குறிப்பிட்டார். ஆனால், அவர்கள் தேர்தலில் எந்த இடத்தை பிரதிநிதித்துவப்படுத்துவார்கள் என்று இன்னும் முடிவு செய்யவில்லை என்று புங் மொக்தார் கூறினார்.

தேர்தலில் போட்டியிட தேர்ந்தெடுக்கப்பட்ட வேட்பாளர்களின் பெயர்களை சபா அம்னோ முடிவு செய்த பின்னர் அறிவிக்கப்படும் என்று அவர் கூறினார்.

மாநிலத்தில் கட்சியின் அடுத்தக்கட்ட நடவடிக்கையை தீர்மானிக்க சபா அம்னோ தலைவர்களுக்கு கட்சி சுதந்திரம் வழங்கியுள்ளது. போட்டியிடும் வேட்பாளர்களையும் தொகுதிகளையும் தீர்மானிப்பதில் மட்டுமல்லாமல், சபாவில் மக்களுக்கு புதிய சலுகைகளை வழங்குவதும் இதில் அடங்கும் என்று அவர் கூறினார்.

சபா சட்டமன்ற தொகுதிகள் இப்போது 60-இல் இருந்து 73- ஆக உயர்த்துவதற்கான முடிவைத் தொட்டு பேசிய அவர், மக்களுக்கு சமச்சீர் சேவைகளை வழங்குவதற்கான முயற்சியாக, மாநிலத்தின் பெரிய மற்றும் பரந்த புவியியலைக் கருத்தில் கொண்டு இதைச் செயல்படுத்த வேண்டிய நேரம் இது என்று கருதுவதாகக் கூறினார்.

கினாபாத்தாங்கான் நாடாளுமன்றத்தில் உருவாக்கப்பட்ட புதிய சட்டமன்ற தொகுதியான லாமாகில் தாம் போட்டியிடுவதாக புங் மொக்தார் உறுதிப்படுத்தினார்.

தற்போது, ​​கினாபத்தாங்கில் சுகாவ் மற்றும் குவாமுட் என்ற இரண்டு சட்டமன்றங்கள் உள்ளன.

Comments