வாஷிங்டன்: வால்ட் டிஸ்னி நிறுவனம் புதன்கிழமை 32,000 தொழிலாளர்களை பணிநீக்கம் செய்வதாகக் கூறியது. இந்த எண்ணிக்கையானது முதலில், அதன் பூங்காக்களில் இருந்து செப்டம்பர் மாதத்தில் அறிவிக்கப்பட்ட 28,000 எண்ணிக்கையை விட அதிகமாகும். நிறுவனம் கொவிட்-19 தொற்றுநோயால் வாடிக்கையாளர்களின் எண்ணிக்கை குறைந்துள்ளதால் போராடும் நிலை ஏற்பட்டுள்ளதாக அது கூறியுள்ளது.
பணிநீக்கங்கள் 2021- ஆம் ஆண்டின் முதல் பாதியில் நடைமுறைக்கு வரும் என்று நிறுவனம் வெளியிட்ட அறிக்கையில் தெரிவித்துள்ளது.
இந்த மாத தொடக்கத்தில், டிஸ்னி தெற்கு கலிபோர்னியாவில் உள்ள அதன் பூங்காவிலிருந்து கூடுதல் தொழிலாளர்களை வேலையிலிருந்து நீக்கியதாகக் கூறியது.
புளோரிடாவில் உள்ள டிஸ்னியின் பூங்காக்கள் மற்றும் அமெரிக்காவிற்கு வெளியே உள்ளவை தொற்று பாதிப்பில் பெரிதும் சிக்காமல் இந்த ஆண்டு தொடக்கத்தில் மீண்டும் திறக்கப்பட்டன.
கொவிட்-19 தொற்று சம்பவங்களின் இரண்டாவது அலைகளை எதிர்த்துப் போராட பிரான்ஸ் ஊரடங்கை விதித்தபோது டிஸ்னிலேண்ட் பாரிஸ் கடந்த மாத இறுதியில் மீண்டும் மூடப்பட வேண்டிய கட்டாயம் ஏற்பட்டது.
ஆயினும், ஷாங்காய், ஹாங்காங் மற்றும் தோக்கியோவில் நிறுவனத்தின் பூங்காக்கள் இன்னும் செயல்படுகின்றன.
