கோலாலம்பூர் : இன்று சனிக்கிழமை (மே 29) தனது 92-வது வயதில் சென்னையில் காலமான பேராசிரியர் மு.ஆனந்தகிருஷ்ணனின் மறைவு தமிழ்க் கூறு நல்லுலகிற்கும், தமிழ்த் தகவல் தொழில்நுட்ப உலகிற்கும் ஈடு செய்ய முடியாத பேரிழப்பு என முன்னணித் தமிழ்த் தகவல் தொழில்நுட்ப வல்லுநரான முத்து நெடுமாறன் தெரிவித்தார்.
“தனிப்பட்ட விருப்பு வெறுப்புகளை ஒதுக்கி வைத்து, அடைய வேண்டிய இலக்கை மட்டுமே குறிக்கோளாகக் கொண்டு அவருடன் பணியாற்றுவோரைச் செயலாற்ற வைப்பவர்” என்று அவரின் தலைமைத்துவ ஆற்றலை முத்து நெடுமாறன் வியந்து போற்றினார்.
“அன்னாரின் 90-வது பிறந்த நாள் கொண்டாட்டம் சென்னையில் நடைபெற்றபோது, மலேசியாவின் சார்பில் நானும், உத்தமம் அமைப்பின் நடப்பு மலேசியக் கிளைத் தலைவருமான சி. ம. இளந்தமிழும் கலந்து கொண்டோம். சிங்கப்பூரில் இருந்து உத்தமம் அமைப்பின் முதல் நிருவாக இயக்குநர் அருண் மகிழ்நனும் கலந்து கொண்டார். அந்த நிகழ்ச்சியில் பலர் பேசினர். நாங்கள் அறிந்ததைவிட இன்னும் மிகப் பெரிய மனிதர் இவர் என்பதை பலரின் பேச்சில் இருந்து தெரிந்து கொண்டோம்” என்று கூறியதோடு, “என்னைப் பார்க்கும் போதெல்லாம் கட்டி அணைத்து அன்பு காட்டும் ஒரு தந்தையாக விளங்கிய பேராசிரியரின் இழப்பு, தனிப்பட்ட முறையில் என்னைப் பெரிதும் வாட்டுகிறது.” என்றும் முத்து நெடுமாறன் வருந்தினார்.
“தமிழ்த் தொழில்நுட்ப வளர்ச்சியில் பல்வேறு மாறுபட்ட முயற்சிகளையும் அணுகுமுறைகளையும் நெறிப்படுத்தி ஒன்றிணைப்பதில் மிகப் பெரிய பங்கினை கடந்த 20 ஆண்டுகளுக்கு மேலாக ஆற்றிவந்தவர் பேராசிரியர் ஆனந்தகிருஷ்ணன். வெவ்வேறு கருத்துக்களைக் கொண்ட தொழிநுட்பர்களையும் ஆர்வலர்களையும் அவர் ஒரு குடையின்கீழ்க் கொண்டு வந்தார்” என்றும் முத்து நெடுமாறன் தனது இரங்கல் செய்தியில் ஆனந்த கிருஷ்ணனுக்குப் புகழாரம் சூட்டினார்.
“இவரது தலைமையின் கீழ் தான் தமிழ்99 விசைமுக அமைப்புமுறையின் தரநிலை வரையறுக்கப்பட்டது. தமிழை முதல் மொழியாகப் பயன்படுத்தும் பயனர்கள், தமிழ் எழுத்துகளைத் தட்டெழுதுவதற்கான நிலையான விசைப்பலகையாகத் தமிழ்99 இன்று மாறியுள்ளது. இதேபோல், தமிழ்க் குறியீட்டுத் தரங்களின் எதிர்காலம் குறித்த பல்வேறு கருத்துகளைக் கொண்டிருந்தவர்களை ஒன்று கூட்டி, ஒருமைப்படுத்தப்பட்ட குறியீட்டு வடிவத்தை ஏற்கச் செய்ததும் பேராசிரியர் அவர்களே!” எனவும் முத்து நெடுமாறன் ஆனந்த கிருஷ்ணனின் பங்களிப்பு குறித்து புகழ்ந்துரைத்தார்.
“பேராசிரியர் ஆனந்தகிருஷ்ணன், உலகெங்கிலும் உள்ள பல்வேறு துறைகளைச் சேர்ந்தவர்கள் எவ்வாறு ஒன்றிணைந்து செயலாற்றலாம் என்பதற்கான முன்மாதிரியான தலைமைத்துவத்தை வெளிப்படுத்தினார். அவர் தமது தனிப்பட்ட விருப்பங்களை ஒதுக்கி வைத்து, வெவ்வேறு குழுக்களைச் சேர்ந்தவர்கள் ஒன்றாக அமர்ந்து, சிக்கல்களுக்குத் தீர்வுகளைக் காண வழிவகுத்தார். அவரிடம் இருந்து நாங்கள் கற்றுக்கொண்டவை கணக்கில. அவரின் மறைவு ஈடு செய்ய முடியாத பேரிழப்பு!”என்று செல்லினத்தின் நிறுவனரும் பேராசிரியரோடு உத்தமம் அமைப்பைத் தோற்றுவித்தவர்களில் ஒருவருமான முத்து நெடுமாறன் தெரிவித்தார்.
பேராசிரியரின் குடும்பத்தாருக்கும் அவர் மறைவால் வாடும் ஆயிரக்கணக்கான மாணவர்களுக்கும் நண்பர்களுக்கும் தமது ஆழ்ந்த இரங்கலையும் முத்து நெடுமாறன் தெரிவித்துக்கொண்டார்.
அண்ணா பல்கலைக்கழகத்தின் முன்னாள் துணைவேந்தரும், உலகத் தமிழ்த் தகவல் தொழில்நுட்ப மன்றத்தின் (உத்தமம்) நிறுவனத் தலைவருமான பேராசிரியர் மு.ஆனந்தகிருஷ்ணன் இன்று காலை தமிழ்நாட்டின் சென்னையில் காலமானார்.
