கோலாலம்பூர்: மலாய் ஆட்சியாளர்கள் நாடாளுமன்றத்தை திறக்க அனுமதி வழங்கியதை அடுத்து பதினான்கு நாட்கள், அம்னோ தேசிய கூட்டணி அரசாங்கத்திற்கு கால அவகாசம் வழங்கி உள்ளது.
அவ்வாறு செய்யத் தவறினால், தகுந்த நடவடிக்கை எடுக்க கட்சி உச்சமன்றக் கூட்டத்தை நடத்த கட்சியைத் தூண்டும் என்று அம்னோ தலைவர் அகமட் சாஹிட் ஹமிடி கூறினார்.
ஆட்சியாளர்களின் அறிவுறுத்தல்களுக்கு ஏற்ப அரசாங்கம் செய்யத் தவறியது அவர்களுக்கு அவமரியாதை என்று அவர் ஓர் அறிக்கையில் கூறினார்.
“இந்த அறிக்கையின் தேதியிலிருந்து 14 நாட்களுக்குள் நாடாளுமன்றக் கூட்டத்தொடரைக் கூட்ட வேண்டும் என்ற மாமன்னர் மற்றும் ஆளும் ஆட்சியாளர்களின் உத்தரவை மதிக்க வேண்டும் என்று அம்னோ திட்டவட்டமாக உள்ளது,” என்று அவர் அறிக்கையில் தெரிவித்துள்ளார்.
அம்னோ அரசியலமைப்பின் 3- வது பிரிவில் குறிப்பிடப்பட்டுள்ளபடி, மலாய் ஆட்சியாளர்களின் நிறுவனத்தை பாதுகாக்க நிறுவப்பட்ட ஒரு கட்சியாக அது இருப்பதாகவும், அவ்வாறு செய்யத் தவறினால் மேலதிக நடவடிக்கைகளை இறுதி செய்ய உச்சமன்ற சிறப்புக் கூட்டம் நடத்தப்படும் என்றும் தெரிவித்தார்.
முன்னதாக, நாடாளுமன்ற கூட்டத்தொடர் நடைபெறுவதற்கு முன்னர் முக்கியமான அம்சங்களை ஆராய்வதற்காக அமைக்கப்பட்ட குழுவில் எதிர்க்கட்சி பிரதிநிதிகளை அரசாங்கம் ஈடுபடுத்தும் என்று பிரதமர் மொகிதின் யாசின் கூறியிருந்தார்.
