ஷா ஆலம்: 15வது பொதுத் தேர்தலை எதிர்கொள்ளும் பக்காத்தான் ஹராப்பானின் அகண்ட கூடாரக் கூட்டணியின் ஒரு பகுதியாக பிரிபூமி பெர்சத்து மலேசியா (பெர்சாத்து) இருக்காது என்று டத்தோஸ்ரீ அன்வார் இப்ராகிம் கூறியிருக்கிறார்.
பக்காத்தானின் 22 மாத ஆட்சியின் வீழ்ச்சியில் பெர்சாத்துவின் பங்கு ஏற்றுக்கொள்ள முடியாத துரோகம் என்றும் அன்வார் கூறினார்.
“தெளிவாக, கட்சிக்கு இழைக்கப்பட்ட துரோகம் மிகவும் வேதனையானது, நான் மட்டுமல்ல, கட்சியினரும் இதை ஏற்றுக்கொள்ள முடியாது. உணர்வுகள் மிகவும் வலுவானவை. போராட்டத்தின் அடிப்படையில் ஓர் அரசாங்கத்தின் வீழ்ச்சியை ஏற்படுத்தினார்கள்” என நேற்று ஞாயிற்றுக்கிழமை (ஜூலை 17) பிகேஆர் தேசிய பேராளர் மாநாட்டிற்குப் பின்னர் நடைபெற்ற செய்தியாளர் கூட்டத்தில் அன்வார் கூறினார்.
பிப்ரவரி 2020 இல் பக்காத்தான் ஆட்சி “ஷெரட்டன் மூவ்” என்ற அரசியல் நெருக்கடியின் போது சரிந்தது. பெர்சத்து கட்சியினரும் பிகேஆரில் இருந்து வெளியேறிய டத்தோஸ்ரீ அஸ்மின் அலி தலைமையிலான நாடாளுமன்ற உறுப்பினர்களும் இணைந்து பக்காத்தான் ஆட்சியைக் கவிழ்த்தனர்.
15வது பொதுத் தேர்தலில் பாரிசான் நேஷனலை எதிர்கொள்ள பக்காத்தானுக்கும் பெர்சாத்து தலைமையிலான பெரிக்காத்தான் நேஷனல் கூட்டணிக்கும் லுக்கும் இடையே ஒத்துழைப்புக்கான அழைப்புகள் வந்துள்ளன. இருப்பினும், இது ஒரு சர்ச்சைக்குரிய விஷயமாக இருந்தது, ஏனெனில் இந்தப் பரிந்துரையை அடிமட்டத் தலைவர்கள் மட்டுமல்ல, முக்கிய பக்காத்தான் ஆதரவாளர்களும் எதிர்க்கின்றனர்.
எதிர்க்கட்சித் தலைவர் என்ற முறையில் அனைத்து எதிர்க்கட்சிகளுடனும் பேச வேண்டும் என்றும் அன்வார் கூறினார். “ஆனால், எங்களின் சீர்திருத்தப் போராட்டங்களுக்கு ஒத்துழைக்காத – துரோகம் இழைத்த மற்றவர்களுடன் புரிந்துணர்வை ஏற்படுத்துவதில் அகண்ட கூடாரக் கூட்டணியைத் தொடர முடியாது,” என்று போர்ட் டிக்சன் நாடாளுமன்ற உறுப்பினருமான அன்வார் கூறினார்.
புதிதாக தேர்ந்தெடுக்கப்பட்ட பிகேஆர் துணைத் தலைவர் ரபிசி ரம்லி, செய்தியாளர் சந்திப்பின் போது உடனிருந்ததோடு, அன்வாரின் கருத்துகளை மீண்டும் வலியுறுத்தினார், இப்போது கவனம் பக்காத்தானின் கீழ் மூன்று கட்சிகளான பிகேஆர், டிஏபி மற்றும் பார்ட்டி அமானா நெகாராவை வலுப்படுத்துவதாகும்.
“எல்லாவற்றையும் விட எங்களுக்கு ஒரு ஒத்திசைவான கொள்கைகள் தேவை” என்று ரபிசி கூறினார்.
அம்னோ மற்றும் பாரிசானை நிராகரித்த எதிர்க்கட்சிகளுக்கு மட்டுமே ஒத்துழைப்பு கிடைக்கும் என்றும் ரபிசி கூறினார்.
வெள்ளிக்கிழமை (ஜூலை 15) தொடங்கிய பிகேஆரின் மூன்று நாள் தேசிய மாநாடு ஞாயிற்றுக்கிழமை (ஜூலை 17) மதியம் முடிவடைந்தது.
