ஜோகூர் பாரு – ஜோகூர் அரச அருங்காட்சியகத்திற்குச் சொந்தமான காண்டாமிருகத்தின் கொம்பினைத் திருடிய குற்றத்திற்காக ஜோகூர் வனவிலங்குத் துறையின் இயக்குநர் கைது செய்யப்பட்டிருக்கிறார்.
இது குறித்து ஜோகூர் மாநில காவல்துறை தலைமை ஆணையர் டத்தோ வான் அகமட் நாஜ்முடின் மொகமட் கூறுகையில், நேற்று டிசம்பர் 25-ம் தேதி, ஜோகூர் பாரு செண்ட்ரல் காவல்நிலையத்தில், இரவு 9.40 மணியளவில் அந்நபர் தானாக வந்து சரணடைந்திருப்பதாகத் தெரிவித்துள்ளார்.
கடந்த அக்டோபர் 21-ம் தேதி, புக்கிட் திம்பலானில் உள்ள அருங்காட்சியக அலுவலகத்தில், வெயிலில் காயவைக்கப்பட்டிருந்த அந்த 100 வயது காண்டாமிருகத்தின் கொம்பினை, ஜோகூர் சுற்றுலாத்துறை கூட்டத்தில் கலந்து கொள்ள வந்த 46 வயதான அந்நபர் திருடியுள்ளார்.
அது அங்கிருந்த ரகசியக் கேமராவில் பதிவாகியுள்ளது என்று வான் அகமட் நாஜ்முடின் மொகமட் தெரிவித்துள்ளார்.
