கூச்சிங் – இரண்டு நாடாளுமன்ற உறுப்பினர்கள் உள்ளிட்ட அறுவரோடு, காணாமல் போன ஹெலிகாப்டரையும், அதில் பயணம் செய்தவர்கள் உயிரோடிருக்கிறார்களா என்பதையும் தேடிக் கண்டுபிடிக்கும் மும்முரத்தில் மீட்புக் குழுவினர் தீவிரமாக ஈடுபட்டிருக்கும் சூழலில் இன்று சரவாக் மாநில சட்டமன்றத்துக்கான வாக்களிப்பு தொடங்கியுள்ளது.
மேற்கு மலேசியாவின் எதிர்க்கட்சித் தலைவர்களையும், சமூகப் போராட்டவாதிகளையும் வரிசையாக சரவாக்கில் நுழைய விடாமல் தடுத்து விட்டு, தேர்தலில் உள்நாட்டுக் கட்சிகளுக்கு மட்டும் அரசியல் முக்கியத்துவம் கொடுத்து தேசிய முன்னணி இந்தத் தேர்தலைச் சந்திக்கின்றது.
முதலமைச்சர் அட்னான் சாத்திமின் முதல் தேர்தல் என்பதால் அவருக்கு எத்தகைய ஆதரவு கிடைக்கப் போகின்றது? –
நஜிப்பின் 1எம்டிபி விவகாரம் வாக்காளர்கள் மத்தியில் – அவர்களின் மனங்களில் பாதிப்புகளை ஏற்படுத்துமா? –
பாஸ் கட்சியின் துணை இல்லாமல் சில சச்சரவுகளோடு களம் இறங்கியிருக்கும் ஜசெக, பிகேஆர் கட்சிகளுக்கு எத்தகைய ஆதரவு கிடைக்கும்? –
என்பது போன்ற பல கேள்விகளுக்கு விடை தரப் போகும் தேர்தலாகவும் சரவாக் தேர்தல் அமையப் போகின்றது.
அதே வேளையில் சரவாக் தேர்தல் முடிவுகள் எத்தகையதாக இருந்தாலும், அதனால் மேற்கு மலேசிய அரசியலில் மாற்றம் இருக்காது – பாதிப்புகள் இருக்காது என்றும் எதிர்பார்க்கப்படுகின்றது.
சரவாக் தேர்தலைத்தொடர்ந்து மத்திய அமைச்சரவையில் மாற்றங்கள் இருக்கும் புதிய அமைச்சர்கள் இடம் பெறக் கூடும் என்றும் எதிர்பார்க்கப்படுகின்றது.
இன்று மாலை 7 மணி முதல் தேர்தல் முடிவுகள் வெளியாகும் எனவும் எதிர்பார்க்கப்படுகின்றது.
