கோலாலம்பூர் – இன்று ஞாயிற்றுக்கிழமை பிற்பகலில் மஇகா தலைமையகத்தின் நேதாஜி மண்டபத்தில் நடைபெற்ற டான்ஸ்ரீ சி.சுப்பிரமணியம் சொற்போர் போட்டியின் இறுதிச் சுற்றில் ‘சங்கத் தமிழ்’ என்ற பெயர் கொண்ட குழு முதல் வெற்றியாளராக வெற்றி பெற்று 10 ஆயிரம் ரிங்கிட் பரிசுப் பணத்தையும், வெற்றிக் கிண்ணத்தையும் பெற்றது.
செடிக் எனப்படும் பிரதமர் துறையின் இந்தியர்களுக்கான சமூக, பொருளாதார மேம்பாட்டுப் பிரிவின் ஆதரவோடும், ஓசை அறவாரியத்தின் ஒத்துழைப்போடும், மாஜூ ஜெயா கூட்டுறவுக் கழகத்தின் ஏற்பாட்டில் இந்த சொற்போர் மாநில வாரியாக நடத்தப்பட்டு, அதன் இறுதிச் சுற்று இன்று நடைபெற்றது.
சொற்போரின் இறுதிச் சுற்றுக்கான நிகழ்ச்சிக்கு மஇகா தேசியத் தலைவரும் சுகாதார அமைச்சருமான டத்தோஸ்ரீ டாக்டர் ச.சுப்பிரமணியம் சிறப்பு வருகையளித்து, சிறப்புரையாற்றியதோடு, பரிசுகளையும் எடுத்து வழங்கினார்.
முதல் பரிசை ‘சங்கத் தமிழ்’ என்ற பெயர் கொண்ட குழு பெற்றது. இரண்டாவது பரிசையும் அதற்கான 5 ஆயிரம் ரிங்கிட் பரிசுப் பணத்தையும் ‘புத்திரா’ என்ற பெயர் கொண்ட குழு பெற்றது.
மூன்றாவது பரிசையும் அதற்கான 3 ஆயிரம் ரிங்கிட் பரிசுப் பணத்தையும் ‘கோ.சா.’ என்ற பெயர் கொண்ட குழு பெற்றது.
நான்காவது பரிசையும் அதற்கான 2 ஆயிரம் ரிங்கிட் பரிசுப் பணத்தையும் ‘ஈழர்’ என்ற குழு வென்றது.
