கிள்ளான்: கிள்ளானில் தினசரி கொவிட்19 சம்பவங்கள் அதிகரித்து வருவதால், மாவட்டத்தின் அனைத்து பள்ளிகளையும் மூடுமாறு மலேசியாவின் கல்வி அமைச்சகத்திற்கு ஆலோசனை வழங்குமாறு தொகுதி நாடாளுமன்ற உறுப்பினர் சார்லஸ் சந்தியாகு சுகாதார அமைச்சர் டாக்டர் அடாம் பாபாவை வலியுறுத்தினார்.
மாவட்டம் இப்போது “சிவப்பு மண்டலம்” (40- க்கும் மேற்பட்ட செயலில் உள்ள சம்பவங்கள் உள்ள மாவட்டம்) என்று அடையாளப்படுத்தப்பட்டுள்ளதால் பெற்றோர்கள் அதிக அக்கறை கொண்டுள்ளனர் என்று அவர் கூறினார்.
பெற்றோர்களின் அச்சத்தைத் தீர்ப்பதற்காக மாவட்டத்தில் பள்ளிப்படிப்பை மூடுமாறு கல்வி அமைச்சர் ராட்ஸி ஜிடினுக்கு அறிவுறுத்துமாறு சந்தியாகு அடாமிடம் வலியுறுத்தினார்.
மாவட்டத்தில் இரண்டு பள்ளிகள் தங்கள் மாணவர்கள் கொவிட்19 தொற்றால் பாதிக்கப்பட்டுள்ளதாகவும், 64 பெற்றோர்கள் மற்றும் ஆசிரியர் சங்கங்கள் பள்ளி மூடலுக்கு தற்காலிகமாக ஆதரவளிப்பதாகவும் தெரிவித்தார்.
தற்போது, ”சிவப்பு மண்டலம்” என்று கருதப்படும் கெடா மற்றும் சபாவுக்கு வெளியே உள்ள ஒரே மாவட்டம் சிலாங்கூர் ஆகும்.
சிலாங்கூரில் இரண்டு “சிவப்பு மண்டலங்கள்” உள்ளன – பெட்டாலிங் (60) மற்றும் கிள்ளான் (77).
இதற்கிடையில், சிலாங்கூரில் பள்ளி அமர்வு வழக்கம் போல் தொடரும் என்று சிலாங்கூர் மாநில கல்வித் துறை முன்னதாக தெரிவித்திருந்தது.
அதன் இயக்குனர், இஸ்மி இஸ்மாயில் கூறுகையில், மலேசிய சுகாதார அமைச்சின் பரிந்துரையைப் பெற்ற பின்னரே எந்தவொரு பள்ளி மூடலும் செய்யப்படும் என்று கூறினார்.
தொற்றுக் கண்டவர்களுடன் நெருங்கிய தொடர்பில் இருந்ததால் மாணவர்கள் மற்றும் ஆசிரியர்கள் வீட்டிலேயே தனிமைப்படுத்தப்பட வேண்டும் என்று அறிவுறுத்தப்பட்டதை அடுத்து, கிள்ளானில் இரண்டு பள்ளிகள் சம்பந்தப்பட்ட ஏழு வகுப்புகள் மட்டுமே மூடப்பட்டுள்ளன.
“பண்டாமாரான் ஜெயா இடைநிலைப் பள்ளியில் முதலாம் படிவம், ஐந்தாம் படிவ வகுப்பை இது உள்ளடக்கியது. தாமான் ஸ்ரீ அண்டாலாஸ் தேசிய பள்ளியில் ஐந்தாம் ஆண்டைச் சேர்ந்த ஆறு வகுப்புகளையும் உள்ளடக்கி உள்ளது”
“இருப்பினும், சிலாங்கூர் மாநில கல்வித் துறை சம்பந்தப்பட்ட அனைத்து வகுப்புகளிலும் துப்புரவு பணிகளை நடத்துகிறது,” என்று அவர் கூறினார்.
பண்டாமாரான் ஜெயா மாணவர்கள், ஆசிரியர்கள் 14 நாள் தனிமைப்படுத்தலில் வைக்கப்பட்டுள்ளனர்.
கொவிட்19 தொற்றுநோய் பரவுவதைக் கட்டுப்படுத்த மாவட்ட சுகாதார அலுவலகத்தின் அனைத்து பரிந்துரைகளுக்கும் இணங்க, நிர்ணயிக்கப்பட்ட நிர்வாக நடைமுறைகளை பள்ளி எப்போதும் கடைப்பிடித்து வருகிறது என்று அவர் கூறினார்.
சிலாங்கூரில் நேற்று வரையிலும் 232 சம்பவங்கள் செயலில் உள்ளன. இதில் கிள்ளானில் 77 சம்பவங்கள் இன்னும் சிகிச்சை பெற்று வருகின்றன.
நேற்றைய நிலவரப்படி, நாட்டில் 691 தொற்று சம்பவங்கள் பதிவாகின. இதுவரையிலும், நாட்டில் பதிவு செய்யப்பட்ட அதிகமான தொற்று எண்ணிக்கை இதுவாகும். மேலும், நேற்று, ஒரு வயது குழந்தை உட்பட நால்வர் மரணமுற்றுள்ளனர்.
