கோலாலம்பூர்: கொவிட் -19 தடுப்பூசி மலேசியாவில் வசிக்கும் வெளிநாட்டினருக்கும் இலவசமாகக் கிடைக்க அமைச்சரவை முடிவு செய்துள்ளது.
“நேற்று இரவு கூடிய அமைச்சரவை, மலேசியாவில் வாழும் வெளிநாட்டினருக்கு கொவிட் -19 தடுப்பூசி இலவசம் என்று ஒப்புக் கொண்டது. மலேசியாவில் வசிக்கும் குடிமக்கள் அல்லாதவர்கள் உட்பட அனைத்து குழுக்களும் இதில் அடங்கும்,” என்று சுகாதார அமைச்சர் டாக்டர் அடாம் பாபா மற்றும் அறிவியல், தொழில்நுட்பம் மற்றும் புத்தாக்க அமைச்சர் கைரி ஜமாலுடின் ஆகியோர் கூட்டு அறிக்கையில் தெரிவித்தனர்.
அரசாங்கத்தால் பாதுகாக்கப்பட்ட தடுப்பூசி வழங்கல் மலேசியர்களுக்கு போதுமானதாக இருக்கும், பொதுமக்களுக்கு தடுப்பூசி திட்டம் தொடங்கும் போது மலேசிய குடிமக்களுக்கு முன்னுரிமை வழங்கப்படும் என்றும் அமைச்சர்கள் குறிப்பிட்டனர்.
நோய்த்தடுப்பு திட்டத்தின் கீழ் வரும் வெளிநாட்டினரில் தூதர்கள், மாணவர்கள், வெளிநாட்டு துணைவர்கள் மற்றும் குழந்தைகள், வெளிநாட்டு தொழிலாளர்கள் மற்றும் அகதிகள் அட்டைதாரர்களும் அடங்குவர் என்று கைரி டுவிட்டரில் விவரித்துள்ளார்.
“கொள்கையளவில், ஆவணமற்ற வெளிநாட்டவர்களுக்கு தடுப்பூசிகளை இலவசமாக வழங்க அமைச்சரவை ஒப்புக் கொண்டுள்ளது. இது எவ்வாறு செயல்படுத்தப்படலாம் என்பது குறித்து குழு மேலும் விவாதிக்கும். மேலும் உதவ மாநில அரசுகள், வெளிநாட்டு தூதரகங்கள், தன்னார்வ தொண்டு நிறுவனங்களை நாங்கள் அணுகுவோம்,” என்று அவர் கூறினார்.
