சென்னை, ஜனவரி 17 – அஜீத் நடிப்பில் கௌதம் இயக்கியுள்ள ‘என்னை அறிந்தால்’ படம் இம்மாதம் 29-ஆம் தேதி வெளியாகவிருக்கிறது. இப்படத்தில் அஜீத்துக்கு ஜோடியாக திரிஷா, அனுஷ்கா ஆகியோர் நடித்துள்ளனர்.
பெரிய எதிர்பார்ப்புடன் வெளியாகவிருக்கும் இப்படத்துக்கு போட்டியாக சரத்குமார் நடிப்பில் உருவாகியுள்ள ‘சண்டமாருதம்’ படமும் வெளியாகவிருக்கிறது. இப்படத்தையும் ஜனவரி 29 -ஆம் தேதி வெளியிடவுள்ளனர்.
சரத்குமார் இரண்டு வேடங்களில் நடித்திருக்கும் சண்டமாருதம் படத்தில் கதாநாயகிகளாக ஓவியா, மீரா நந்தன் ஆகியோர் நடித்துள்ளனர்.
ஏ.வெங்கடேஷ் இயக்கியுள்ள இப்படத்தில் சமுத்திரகனி, ராதிகா சரத்குமார், தம்பி ராமையா, டெல்லி கணேஷ், சிங்கம் புலி ஆகியோரும் முக்கிய கதாபாத்திரத்தில் நடித்துள்ளனர்.
இப்படத்தை ராதிகா சரத்குமார், லிஸ்டின் ஸ்டீபன் இருவரும் இணைந்து தயாரிக்கின்றனர். ‘சண்டமாருதம்’, வெங்கேடஷ்-சரத்குமார் இணைந்து பணியாற்றும் 4-வது படமாகும்.
இருவரும் ஏற்கெனவே, ‘மகாபிரபு’, ‘ஏய்’, ‘சாணக்யா’ ஆகிய படங்களில் இணைந்து பணியாற்றியுள்ளனர் என்பது குறிப்பிடத்தக்கது.
