சென்னை – ரஜினிகாந்தின் ‘2.0’ திரைப்படம் எதிர்வரும் நவம்பர் 29-ஆம் தேதி வெளிவரவிருக்கும் நிலையில் அவரது அடுத்த படமான “பேட்ட” பொங்கலுக்கு வெளிவரும் என எதிர்பார்க்கப்படுகிறது. இந்தப் படத்தில் ரஜினியுடன் இணையும் பாபி சிம்ஹாவும் இந்தத் தகவலை உறுதிப்படுத்தியுள்ளார் என ஊடகங்கள் தெரிவிக்கின்றன.
நேற்று வெள்ளிக்கிழமை வெளியான சாமி -2 திரைப்படத்தை நேரில் திரையரங்கில் காண வருகை தந்த பாபி சிம்ஹாவைச் சந்தித்த இரசிகர்கள் ‘பேட்ட’ படத்தின் நிலவரம் குறித்துக் கேட்டபோதே அவர் இவ்வாறு தெரிவித்தார். சாமி-2 படத்தில் பாபி சிம்ஹா முக்கியக் கதாபாத்திரத்தில் நடித்திருக்கிறார்.
பேட்ட படத்தில் பாபி சிம்ஹாவுடன் விஜய் சேதுபதியும் நடித்திருக்கிறார். திரிஷா, சிம்ரன் ஆகியோரும் இணைகிறார்கள். தற்போது இந்தப் படத்தின் படப்பிடிப்பு வட இந்தியாவின் லக்னோவில் நடைபெற்று வருவதாக தகவல்கள் தெரிவிக்கின்றன.
எனினும், அஜித் நடித்து வரும் விசுவாசம் படமும் 2019 பொங்கலுக்கு வெளியாகும் என அறிவிக்கப்பட்டிருப்பதால், இரண்டு படங்களுக்கும் இடையில் மோதல் ஏற்படுவதைத் தவிர்க்கும் பொருட்டு ஏதாவது ஒரு படத்தின் வெளியீட்டுத் தேதி தள்ளிப் போகலாம் என்றும் எதிர்பார்க்கப்படுகிறது.
