இலண்டன் – ஒரு காலத்தில் பிரிட்டனின் இரும்புப் பெண்மணியாக வர்ணிக்கப்பட்டு, பல ஆண்டுகள் அந்நாட்டின் பிரதமராகப் பணியாற்றியவர் மார்கரெட் தாட்சர். அவருக்குப் பின்னர் இன்னொரு பெண் பிரதமரை பிரிட்டன் அடுத்த சில மாதங்களில் பெறக் கூடும் என்ற ஆரூடங்கள் வலுத்து வருகின்றன.
பதவி விலகுவதாக அறிவித்துள்ள டேவிட் கேமரூனுக்குப் (படம்) பதிலாக முன்னாள் இலண்டனர் மேயர் போரிஸ் ஜோன்சன் பிரதமர் பதவிக்குப் போட்டியிடுவார் எனப் பெரிதும் எதிர்பார்க்கப்பட்டது.
ஆனால், நேற்று அவர் பிரதமர் பதவிக்குத் தான் போட்டியிடப் போவதில்லை என அறிவித்து விட்டார்.
இதனைத் தொடர்ந்து பிரிட்டனின் நடப்பு உள்துறை அமைச்சர் தெரசா மே (படம் -Theresa May) டேவிட் கேமரூனுக்கு பதிலாக, அடுத்த பிரதமராக கன்சர்வேடிவ் கட்சி சார்பாகப் பிரதமர் பதவிக்குப் போட்டியிடத் தயார் என வியாழக்கிழமை அறிவித்துள்ளார்.
தனக்குப் பிறகு புதிய பிரதமராகப் பதவியேற்பவர், ஐரோப்பிய ஒன்றியத்திலிருந்து பிரிட்டனை பிரித்தெடுக்கும் நடவடிக்கைகளில் ஈடுபடுவார் என்றும் கேமரூன் அறிவித்திருந்தார்.
இதனைத் தொடர்ந்து, கன்சர்வேடிவ் கட்சியின் நாடாளுமன்றத் தலைவர் பதவிக்கு தெரசா மே சுமுகமாகத் தேர்ந்தெடுக்கப்பட்டால், பிரிட்டனின் அடுத்த பிரதமராக இன்னொரு பெண்மமணி வரக் கூடும். மார்கரெட் தாட்சருக்குப் பின் மற்றொரு பெண் பிரதமரை பிரிட்டன் பெறும்.
