கோலாலம்பூர் – கூட்டணிக்கு அனுமதி வழங்கவில்லையென சங்கங்களின் பதிவிலாகாவுக்கு (ஆர்ஓஎஸ்) எதிராக, பக்காத்தான் ஹராப்பான் தொடுத்திருக்கும் வழக்கு, தற்போதைய நாடாளுமன்றக் கூட்டத்தின் கடைசி நாள் அன்று விசாரணைக்கு வருகின்றது.
கடந்த மார்ச் 5-ம் தேதி தொடங்கிய நாடாளுமன்றக் கூட்டம் வரும் ஏப்ரல் 5-ம் தேதியோடு நிறைவடைகின்றது. அதன் பின்னர் நாடாளுமன்றம் கலைக்கப்பட்டு, தேர்தல் தேதி அறிவிக்கப்படும் என எதிர்பார்க்கப்படுகின்றது.
இந்நிலையில், பக்காத்தான் ஹராப்பான் சார்பில் 5 அரசியல் தலைவர்கள் தொடுத்த இவ்வழக்கில் அவர்களின் பிரதிநிதியாக வழக்கறிஞர் மிச்சல் நங், வரும் ஏப்ரல் 5-ம் தேதி உயர்நீதிமன்றத்தில் நடக்கும் விசாரணையில் ஆஜராகிறார்.
இது குறித்து மிச்சல் நங், மலாய் மெயில் இணையதளத்திற்கு அளித்திருக்கும் தகவலில், “இவ்வழக்கு விசாரணையை மிக விரைவில் நடத்த வேண்டுமென்று நீதிமன்றத்திடம் கோரிக்கை விடுத்திருக்கிறோம். காரணம் தேர்தல் தேதி மிக விரைவில் அறிவிக்கப்படவிருக்கிறது. மேலும் வரும் ஏப்ரல் 5-ம் தேதி தான் நாடாளுமன்றமும் தனது கடைசி கூட்டத்தை நடத்துகிறது” என்று தெரிவித்திருக்கிறார்.
