கோத்தா கினபாலு: சபாவில் நடைபெற இருக்கும் மாநிலத் தேர்தல் திட்டமிட்டபடி நடைபெறும் என்று தேர்தல் ஆணையத் தலைவர் டத்தோ அப்துல் கானி சல்லே தெரிவித்தார்.
சபா கிழக்கு கடற்கரை மாவட்டங்களான தாவாவ் மற்றும் லாஹாட் டாத்துவில் புதிய கொவிட் 19 தொற்றுக் குழுக்கள் பதிவானதை அடுத்து அதிகாரிகள் நெருக்கமான தகவல்களை கண்டறிந்து வருகிறார்கள் என்று அவர் கூறினார்.
சிலிம் இடைத்தேர்தல் போன்று, கடுமையான நிர்ணயிக்கப்பட்ட நிர்வாக நடைமுறைகளை அதிகாரிகள் பராமரிப்பார்கள் என்று அவர் குறிப்பிட்டார்.
“நாங்கள் முன்னேற்றங்களை கண்காணிப்போம். ஆனால், இப்போதைக்கு, எல்லாம் திட்டமிட்டபடி நடக்கும், ”என்று அவர் கூறினார்.
பெந்தேங்கில் உள்ள புதிய சிறைச்சாலை தொற்றுக் குழு, லாஹாட் டாத்து தொற்றுக் குழு கட்டுப்பாட்டில் உள்ளதாகவும், இது வாக்களிக்கும் செயல்முறைக்கு அச்சுறுத்தலாக இருக்காது என்றும் அவர் கூறினார்.
செப்டம்பர் 26 அன்று வாக்குப்பதிவு நடைபெற இருக்கும் நிலையில், இந்த சனிக்கிழமை வேட்பு மனு தொடங்குகிறது.
சபா தொற்றுக் குழுவில் இப்போது 66 உறுதிப்படுத்தப்பட்ட சம்பவங்கள் இருப்பதாக சுகாதார அதிகாரிகள் நேற்று தெரிவித்தனர். அவற்றில் 50 சம்பவங்கள் லாஹாட் டாத்துவிலும், 16 தாவாவிலிருந்து கண்டறியப்பட்டுள்ளன.
நேற்று திங்கட்கிழமை, அதிரடியாக 62 புதிய கொவிட்19 தொற்று சம்பவங்கள் பதிவு செய்யப்பட்டுள்ளன. கடந்த ஜூன் 4-ஆம் தேதிக்குப் பிறகு கடந்த 3 மாதங்களில் இல்லாத அளவுக்கு மிக அதிகமான ஒருநாள் தொற்று சம்பவங்களின் பதிவாக இது கருதப்படுகிறது.
