டெல்லி, மார்ச் 14 – ஒன்பது கட்டங்களாக அறிவிக்கப்பட்டுள்ள நாடாளுமன்றத் தேர்தலில் முதல் கட்ட தேர்தலுக்கான வேட்புமனுத் தாக்கல் இன்று தொடங்குகிறது. முதல் கட்டத் தேர்தலில் அசாம் மாநிலத்தின் ஐந்து தொகுதிகளுக்கும், திரிபுரா மாநிலத்தின் ஒரு தொகுதிக்கும் ஏப்ரல் 7-ஆம் தேதி வாக்கு பதிவு நடைபெறவுள்ளது.
இதை முன்னிட்டு இந்த ஆறு தொகுதிகளுக்கும் வேட்புமனுத் தாக்கல் இன்று தொடங்குகிறது. 21-ஆம் தேதி வேட்புமனுத் தாக்கலுக்கான கடைசி தேதியாக அறிவிக்கப்பட்டுள்ளது.
2 மற்றும் 3-வது கட்ட தேர்தல் நடைபெறவுள்ள 93 தொகுதிகளுக்கான வேட்புமனுத் தாக்கல் நாளை ஆரம்பமாகிறது. குறிப்பாக மணிப்பூர், மேகாலயா, மிசோரம், நாகாலாந்து மாநிலங்களில் உள்ள தலா ஒரே ஒரு மக்களவைத் தொகுதிக்கும் நாளை வேட்புமனுத் தாக்கல் தொடங்குகிறது.
கேரளா,ஹரியானா மாநிலங்களில் அனைத்து தொகுதிகளிலும் வேட்புமனுத் தாக்கல் நாளை ஆரம்பமாகிறது. இந்த இரு மாநிலங்களிலும் ஏப்ரல் 10-ஆம் தேதி வாக்கு பதிவு நடைபெறவுள்ளது. மூன்றாம் கட்டம் தேர்தல் நடைபெறவுள்ள பீகார், உத்திரப்பிரதேசம், ஹிமாச்சலப்பிரதேசம், மத்தியப்பிரதேசம் உள்ளிட்ட மாநிலங்களில் சில தொகுதிகளுக்கும் வேட்புமனுத் தாக்கல் நாளை ஆரம்பமாகிறது.
