சென்னை, ஜூலை 7 – கத்திரி வெயில் முடிந்து மாதக்கணக்கில் ஆகி, தென்மேற்குப் பருவமழைக் காலம் தொடங்கி நடந்து வந்தாலும், தமிழகத்தில் வெயில் விட்டபாடில்லை. தலைநகர் சென்னையில் நூற்றாண்டில் இல்லாத அளவிற்கு வெயில் மக்களைக் கடுமையாக வாட்டி வருகிறது.
சென்னை, மதுரை, திருச்சி , திருநெல்வேலி உள்ளிட்ட பெரும்பாலான மாவட்டங்களில் கடந்த 4 நாட்களாக வெயில் சுட்டெரித்து வருவதாக மக்கள் தெரிவித்துள்ளனர்.
வெயிலின் தாக்கம் குறித்து சென்னை வாசிகள் கூறுகையில், “காலை 8 மணிக்கே கோடைக் காலம் போல வெயில் கொதிக்கிறது. எவ்வளவுதான் தண்ணீர், குளிர்பானங்கள் அருந்தினாலும் தாகம் நிற்பதில்லை. காரணம் அந்த அளவுக்கு வியர்வை வெளியேறுகிறது. குளிரூட்டப்பட்ட அறைகளில் இருப்பவர்கள் மட்டுமே இந்த வெயிலின் தாக்கத்தில் இருந்து தப்பித்துக் கொள்கிறார்கள்”
“ஆனால் கட்டிடம் கட்டும் தொழிலாளர்களும், கூலி வேலை செய்பவர்களும் வெயிலின் கொடுமையால் கடுமையாகப் பாதிக்கப்படுகின்றனர். கடந்த சில நாட்களாக நுங்கம்பாக்கத்தில் 105.26 டிகிரி வெயிலும், மீனம்பாக்கத்தில் 104.54 டிகிரி வெயிலும் பதிவாகி உள்ளது. சென்னையில் கடந்த 1915-ம் ஆண்டு ஜூலை மாதத்தில் தான் அதிகபட்சமாக 106 டிகிரி வெயில் பதிவானது. சுமார் நூறு ஆண்டுகளுக்குப்பிறகு இப்போது தான் வெயிலின் உக்கிரம் அதிகரித்துள்ளது” என்று தெரிவித்துள்ளனர்.
வெயிலின் தாக்கம் குறித்துச் சென்னை வானிலை மண்டல ஆராய்ச்சி இயக்குனர் எஸ்.ஆர்.ரமணன் கூறியிருப்பதாவது:-
“கடந்த சில நாட்களாக வானம் தெளிவாக இருப்பதால் வெயிலின் தன்மை அதிகமாக உள்ளது. இந்தக் கடும் வெயில் இன்னும் 3 நாட்களுக்கு நீடிக்கும். எதிர்வரும் 9-ம் தேதிக்குப் பிறகு வெயில் தன்மை குறைந்து லேசாக சில இடங்களில் மழை பெய்யும்” என்று தெரிவித்துள்ளார்.
