கோலாலம்பூர்: பிகேஆர் கட்சித் தேர்தல்கள் எதிர்வரும் மே மாதம் நடைபெறவிருக்கின்றன. நோன்பு மாதம், ஹரிராயா கொண்டாட்டங்கள் போன்ற காரணங்களால் அமைதியாயிருந்த பிகேஆர் தேர்தல் களம் இனி சூடு பிடிக்கத் தொடங்கும்.
ஏப்ரல் மாதம் முழுவதும் தொகுதிகள் நிலையிலான தேர்தல்கள் நடைபெறும். அதன் பின்னரே மே மாதத்தில் தேசிய நிலையிலான பதவிகளுக்கான தேர்தல் நடைபெறும்.
அனைவரின் கவனத்தையும் ஈர்த்திருப்பது தேசிய உதவித் தலைவர்களுக்கான தேர்தல். தலைவர் பதவிக்கு அன்வார் இப்ராகிமும், துணைத் தலைவர் பதவிக்கு ரபிசி ரம்லியும் போட்டியின்றித் தேர்வு பெறுவார்கள் என எதிர்பார்க்கப்படுகிறது. எனவே, 4 உதவித் தலைவர்களுக்கான போட்டி கடுமையானதாக இருக்கும்.
இதுவரையில் அன்வார் இப்ராகிமின் மகள் நூருல் இசா, சிலாங்கூர் மந்திரி பெசார் அமிருடின் ஷாரி, அமைச்சர் நிக் நாஸ்மி, நெகிரி செம்பிலான் மந்திரி பெசார் அமினுடின் ஹாருண் ஆகியோர் உதவித் தலைவருக்கான போட்டியில் குதித்திருக்கிறார்கள். சீன சமூகத்தின் சார்பில் சாங் லீ காங் உதவித் தலைவர் பதவிக்குப் போட்டியிடவிருக்கிறார்.
ரமணன், சத்ய பிரகாஷ், மணிவண்ணன் போட்டி!

சுங்கை பூலோ தொகுதி தலைவராகப் போட்டியின்றித் தேர்ந்தெடுக்கப்பட்ட துணை அமைச்சர் டத்தோஸ்ரீ ரமணன் ராமகிருஷ்ணன், டாக்டர் சத்ய பிரகாஷ் பிரதமரின் பிகேஆர் கட்சிக்கான அரசியல் செயலாளர் மணிவண்ணன் ஆகியோர் உதவித் தலைவர் பதவிகளுக்குக் குறிவைத்திருக்கும் இந்திய வேட்பாளர்களாவர்.
சிகாமாட் நாடாளுமன்ற உறுப்பினர் ஆர்.யுனேஸ்வரன், ஒற்றுமைத் துறை அமைச்சின் துணை அமைச்சர் சரஸ்வதி கந்தசாமி ஆகியோரும் போட்டியிடுவார்கள் என எதிர்பார்க்கப்பட்டாலும் அவர்கள் இருவரும் இன்னும் அதிகாரபூர்வமாக அறிவிக்கவில்லை. தொகுதி நிலையிலான தேர்தல்கள் முடிவடைந்ததும் அவர்கள் உதவித் தலைவர் பதவிக்குப் போட்டியிடுவதை அறிவிப்பார்கள் என எதிர்பார்க்கப்படுகிறது.

இப்போது எழுந்துள்ள கேள்வி பிகேஆர் உதவித் தலைவராக இந்தியர்கள் யாரும் வெற்றி பெற முடியுமா என்பதுதான்! காரணம், 2022 பிகேஆர் கட்சி தேர்தலில் இந்தியர் யாரும் உதவித் தலைவராக வெற்றி பெறவில்லை.
2022-இல் நடைபெற்ற பிகேஆர் கட்சித் தேர்தலில் அதிக வாக்குகளில் முதலாவதாக சிலாங்கூர் மந்திரி பெசார் அமிருடின் ஷாரி, இரண்டாவதாக அமைச்சர் சாங் லீ காங், மூன்றாவதாக நிக் நாஸ்மி நிக் அகமட், நான்காவதாக நெகிரி செம்பிலான் மந்திரி பெசார் அமினுடின் ஹாருண் ஆகியோர் வெற்றி பெற்றனர்.
இவர்கள் நால்வருமே மீண்டும் தங்களின் உதவித் தலைவர் பதவிகளைத் தற்காத்துக் கொள்ளப் போட்டியிடப் போவதாக அறிவித்துள்ளனர்.
2022-இல் வெற்றி வாய்ப்பைத் தவறவிட்ட மணிவண்ணன்

2022-இல் போட்டியிட்ட இந்தியர்களில் அதிக வாக்குகள் பெற்று ஐந்தாவதாக வந்தவர் மணிவண்ணன் கோவின். 2008-இல் காப்பார் நாடாளுமன்ற உறுப்பினராக வெற்றி பெற்றவர். இருந்தாலும் அவரால் முதல் நான்கு உதவித் தலைவர்களுக்கான இடங்களில் ஒன்றைப் பிடிக்க முடியவில்லை.
2018 பிகேஆர் தேர்தலில் மணிவண்ணன் தவிர மேலும் நான்கு இந்திய வேட்பாளர்கள் போட்டியிட்டாலும் யாருமே வெற்றி பெறவில்லை.
இந்த முறை உதவித் தலைவர் பதவிக்கு மீண்டும் போட்டியிடப்போவதாக மணிவண்ணன் அறிவித்துள்ளார்.

2018 பிகேஆர் கட்சித் தேர்தலில் போட்டியிட்ட நூருல் இசா அன்வார் முதலாவதாகவும், சுரைடா கமாருடின் இரண்டாவதாகவும், சேவியர் ஜெயகுமார் மூன்றாவதாகவும் தியான் சுவா நான்காவதாகவும் அதிக வாக்குகளில் உதவித் தலைவர்களாக வெற்றி பெற்றனர்.
இந்நிலையில் எதிர்வரும் மே மாதம் நடைபெறவிருக்கும் பிகேஆர் கட்சித் தேர்தலில் இந்திய வேட்பாளர்கள் யாரும் உதவித் தலைவர்களாக வெற்றி பெறுவார்களா என்ற ஆர்வம் இந்திய சமூகத்தில் ஏற்பட்டுள்ளது.
பிகேஆர் உறுப்பினர்களில் 40 விழுக்காட்டினர் இந்தியர்கள் எனக் கூறப்படுகிறது. ஆனால், இந்த முறை பேராளர்களில் எத்தனை பேர் இந்தியர்களாகத் தேர்ந்தெடுக்கப்படுவார்கள் – அவர்களால் ஓர் இந்தியரை உதவித் தலைவராக வெற்றி பெற வைக்க முடியுமா என்ற கேள்வியும் எழுந்துள்ளது.
மாற்றப்பட்ட தேர்தல் நடைமுறைகள்
இந்த முறை பிகேஆர் கட்சித் தேர்தல் நடைமுறைகளும் மாற்றப்பட்டுள்ளன. முன்பு போல் உறுப்பினர்கள் நேரடியாக வாக்களிக்கும் நடைமுறை இப்போது இல்லை. மாறாக, பேராளர்களைத் தேர்ந்தெடுத்து அவர்கள் வேட்பாளர்களைத் தேர்ந்தெடுக்கும் நடைமுறை உருவாக்கப்பட்டுள்ளது.
ஒவ்வொரு தொகுதியில் உறுப்பினர்களாக இருப்பவர்களின் இன விழுக்காட்டிற்கு ஏற்ப பேராளர்கள் தேர்ந்தெடுக்கப்படுவர். உதாரணமாக, ஒரு தொகுதியில் 20 விழுக்காட்டு இந்தியர்கள் உறுப்பினர்களாக இருக்கிறார்கள் என்றால், அந்தத் தொகுதியின் பேராளர்களில் 20 விழுக்காட்டினர் இந்தியர்களாக இருக்க வேண்டும். ஒரு தொகுதியில் 50 விழுக்காடு உறுப்பினர்கள் மலாய்க்காரர்கள் என்றால் 50 விழுக்காடு பேராளர்களும் மலாய்க்காரர்களாக இருக்க வேண்டும். இது தவிர 30 விழுக்காடு பேராளர்கள் மகளிராக இருக்க வேண்டும்.
இது போன்ற மாற்றங்களால் – அதிக எண்ணிக்கையிலான இந்தியர்கள் போட்டியிடுவதால் – இந்தியர் வாக்குகள் பிரியும் என்பதால் – இந்தியர்கள் யாரும் உதவித் தலைவர்களாக வெல்வது கடினம் எனக் கருதப்படுகிறது. மாறாக, இந்திய வேட்பாளர்கள் அனைவரும் கலந்து பேசி ஒருமித்த கருத்தோடு ஒரு பொது வேட்பாளரை நிறுத்தி அவருக்கு அனைத்துத் தரப்புகளும் ஆதரவு தந்தால் அவரால் வெற்றி பெற முடியும்.
நடக்குமா?