நியூயார்க், ஜூன் 30 – அமெரிக்காவின் பென்சில்வேனியா மாகாணத்துக்கு உட்பட்ட லான்செஸ்டர் விமான நிலையத்தில் இருந்து, மசாசூசெட்ஸ் மாகாணத்தின் நார்வுட் நினைவு விமான நிலையத்துக்குச் சிறிய ரக விமானம் ஒன்று சென்று கொண்டிருந்தது.
பீச்கிராப்ட் பி.இ.36 ரகத்தைச் சேர்ந்த அந்த விமானத்தில் 3 பேர் இருந்தனர். இந்த விமானம் பிளைன்வில்லிப் பகுதியில் சென்று கொண்டிருந்தபோது, திடீரென அங்கிருந்த ஒரு வீட்டில் விழுந்து நொறுங்கியது. இதில் விமானத்துடன் சேர்ந்து அந்த வீடும் தீப்பிடித்து எரிந்தது.
உடனே வீட்டில் இருந்தவர்கள் அனைவரும் வெளியே ஓடித் தப்பினர். இந்தக் கோர விபத்தில், விமானத்தில் பயணம் செய்த 3 பேரும் உயிரிழந்தனர். அவர்களின் விபரம் குறித்து இதுவரை தகவல் இல்லை.
விபத்துக் குறித்துத் தகவல் அறிந்து அங்கு விரைந்த பேரிடர் மீட்புக்குழுவினர், மீட்புப்பணிகளை மேற்கொண்டனர். இந்த விபத்துக்கான காரணம் குறித்துத் தெரியவில்லை. இது குறித்து விசாரணை நடந்து வருகிறது என அமெரிக்க காவலர்கள் தெரிவித்தனர்.
